Call center company gironda tungod sa reklamo sa Pfizer

CEBU, Philippines - Usa ka call center company ang gironda sa mga sakop sa Criminal Investigation and Detection Management Group (CIDG) diha sa barangay Subangdako syudad sa Mandaue sa miaging gabii pasado alas-10.

Ang Anti-Transnational and Cyber-Crimes Investigation Branch sa CIDG maoy mihimo sa maong operasyon pinasikad sa search warrant nga giisyu ni NCR-RTC Branch 22 Executive Judge-Marino dela Cruz batok sa 7/24 Care Incorporated nga usa ka call center company sa maong barangay.

Ang maong kompanya giingong gireklamo sa Pfizer nga usa ka pharmaceutical company nga tighimo og Viagra. Sumala pa sa CIDG dunay kliyente sa Pfizer nga tiggamitan og Viagra ang namatay ug gipasangil nga diha niini napalit pinaagi sa on-line ang maong tabletas.

Gidudahan nga ang gibaligyang Viagra sa maong kompanya mga peke.

Apan ang operasyon nagubot og kadiyot ug diriyot pa maaresto ang abogado sa maong kompanya nga si Atty. Dominador Cafe kinsa miinsister nga walay labot sa search warrant ang mga call center agents nga nagtrabaho nga gidid-an sa CIDG nga makagawas sa establisamento.

Matud pa ni Cafe kung unsay nakabutang sa search warrant sama sa computers, CPU, printers ug uban pang gadgets nga ipasusi sa korte mao ra gyud untay susihon ug dili ang mga trabahante. Ang CIDG team gikan sa Manila nga gipangulohan ni Sr. Supt Gilbert Sosa mikuha og pipila ka computers, dokumento ug uban pa gituohan nilang magamit nila sa ilang imbestigasyon. Dugang pa ni Sosa nga makig-alayon sila sa awtoridad sa Estados Unidos aron matino kung si kinsa ang angayang manubag sa reklamo.

Samtang gibutyag usab ni Sosa nga pipila ka empleyado sa maong establisamento mikompirmar nga tinuoray gyud nga namaligya sila og pekeng Viagra ang maong establisemento. Si Cafe sa interbyu sa TV Patrol Central Visayas kagahapon mihimakak sa maong pasangil nga namaligya sila og mini nga tambal on-line ug posibleng nasaypan ra sila tungod kay wala man gyud silay account nga nalambigit sa pagpamaligya og tambal.

Gipadayag usab niini ang kadakong alkanse nga gibunga sa maong alegasyon diha sa ilang kompanya tungod sa pagkahunong sa operasyon atol sa maong raid.

Kasong Republic Act 8484 o The Acces Device Act maoy giandam sa kapolisan nga isang-at batok sa mga kadagkuan sa maong establisemento. (BANAT NEWS)