Duha napasok sa ilawom sa Ceres angol

CEBU, Philippines - Duha ang naangol human mapasok ilawom sa Ceres Bus didto sa barangay Pitalo, lungsod   sa San Fernando niadtong   Domingo sa gabii.

 Ang mga biktima mao sila si Joselito Villalon, 30, ulitawo nga taga barangay Manlapay lungsod sa Dumanjug , ug Anita Carba, 39, minyo nga taga barangay Lahug, dakbayan sa Sugbo

Samtang ang Ceres Bus   nga may body number GWY-570 gimaneho ni Aquilino Daslon, 41, minyo, nga taga lungsod sa Pinamungahan.

Si PO3 Julius Cesar Paragues sa San Fernando Police Station mibutyag sa Banat News  nga ang Ceres Bus nagdagan paingon sa dakbayan sa Sugbo nga gisunod usab sa duha ka motor nga gimaneho nila ni Villalon ug Edilberto Carba, bana ni Anita Carba, nga pulos paingon sa susamang direction. Apan sa pag-abot niini sa maong lugar kalit lang nga mihunong ang gisunod nilang Ceres Bus tungod kay may prosesyon sa unahan.

Gumikan sa kakalit nga pagpreno   wala dayon makabantay si Edilberto ,   busa nadasmagan niini ang   motorsiklo  nga iyang gisundan nga gimaneho ni Villalon.

Gumikan sa kakusog sa pagkadasmag nalagpot si Villalon ug si Anita Carba ngadto sa ilawom sa Ceres Bus.

Hinuon nasuwertihan nga wala sila malatayi sa ligid sa Ceres.

Si Villalon ug si Carba gihatod dayon ngadto sa Minglanilla District Hospital   apan gi-transfer usab dayon ngadto sa Vicente Sotto Memorial Medical Center (VSMMC).

Samtang ang driver sa Ceres Bus giimbistigar dayon sa kapolisan sa maong lungsod. WC - BANAT NEWS