Nangawat og scrap metal gipusil patay

CEBU, Philippines - Namatay ang usa ka ulitawo human kini pusila sa usa ka trabahante sa usa ka establisemento nga iyang giingong gikawatan didto sa barangay Lawaan II, dakbayan sa Talisay sa miaging gabii.

Ang biktima nailhan nga si Darwin Bacasmus, 32, ulitawo, nga taga barangay Molave sa maong dakbayan, samtang ang suspetsado giila lang sa ngalang Banny nga giingong trabahante sa Wilcom Depot nga nahimutang sa Lawaan II.

Sa imbistigasyon nga gihimo sa kapolisan sa Talisay City Police Office nasuta nga si Bacasmus misulod sa koral sa Wilcom Depot ug nanguha og mga scrap metal.

Unya dihang mogawas na unta kini kay mopauli giingong giluthang kini ni Banny gamit ang armas nga wala pa hisayri ang kalibre.

Ang biktima gihatud dayon ngadto sa Vicente Sotto Memorial Medical Center sa dakbayan sa Sugbo apan giingong namatay kini human sa pipila ka oras gumikan sa samad pinusilan sa walang bahin sa iyang tiyan. Padayon pang gipangita sa kapolisan ang suspetsado kinsa giingong nakasibat human sa maong hitabo.  WC    - BANAT NEWS