Way helmet nabagdok sa gutter patay

CEBU, Philippines - Pulos patay ang duha ka ulitawo human   mabagdok sa gutter ang ilang mga ulo nga walay helmet sa pagkalagpot nila sa motorsiklo nga ilang gisakyan didto sa barangay Langtad siyudad sa Naga sa miaging kaadlawon.

Ang mga biktima mao sila si Mario Esrael, 19, ug si Angelito Bedulido, 20, pulos ulitawo, nga managsilingan sa barangay South Poblacion, lungsod sa San Fernando.

Si PO2 Ronjie Nadorra, desk officer sa Naga City Police Station mibutyag sa Banat News nga ang mga biktima gikan sa Poblacion, siyudad sa Naga ug paingon na untang mamauli.

Matud pa sa mga estambay nga nakasaksi sa hitabo   nga kusog kaayong nagdagan ang motorsiklo nga gimaneho ni Esrael ug pag-dayung liko niini sa kurbadahon nga bahin sa karsada sa Langtad wala na niini makontrolar ang dagan sa sakyanan ug mitipas kini sa karsada ug mibaliwliw paingon ngadto sa gutter nga sementado.

Didto nagdungan og kalagpot ang mga biktima ug nagdungan usab og kabagdok ang ilang mga ulo sa gutter nga sementado.

Gumikan kay way helmet, maayong pagkalusbo sa ilang mga bagulbagol nga maoy hinungdan sa hinanali nilang kamatayon.

Gipanghatod dayon sa mga estambay ang duha   ngadto   sa Minglanilla District Hospital diin sila ideklarar nga patay na sa pag-abot.

Ang kapolisan nagkanayon nga wala mosipyat ang kagamhanan sa pagpatumang higpit sa balaod bahin sa helmet.

Sa pagkakaron nagpadayon ang Department of Trade and Industry (DTI) sa paghiling sa mga helmet nga angayang kapapitlan og sticker nga ICC.

Buot ipasabot nga ang maong mga helmet nga kapitlan niini kalipikado sa gikinahanglang kalidad ug matang sa kalig-on nga mosakar sa gikinahanglan sa helmet law.

Sayo niini mipasidaan si DTI Regional Director Asteria Caberte nga kutob sa mga helmet nga di mopasar sa quality test ug dili kapapitlan og sticker nga ICC siguradong dakpon sa mga tinugyanan sa Land Transportation Office (LTO) ug sa mga kapolisang tahasan sa pagpanakop sa malapason.

Hinuon tungod sa daghang reklamo sa publiko si LTO Regional Director Raul Aguilos misugot nga hangtod pa sa Disyembre ning tuiga ang paghatag og lugway  ug pasaylo sa mga wala pay helmet. (/WC)  - BANAT NEWS