CEBU, Philippines - Human siya ilha nga buhing bayani sa bag-ong henerasyon, pasidunggan usab ni Gobernador Gwen Garcia ang Sugbuanon nga kanhi caregiver sa nasud nga Syria unya sa anibersaryo sa lalawigan.
Si Alma Bella Guiao maoy makadawat sa maong pasidungog gumikan sa iyang pagdala sa 30 ka mga Overseas Filipino Workers (OFW) gikan sa Homs ug Latakia, Syria paingon sa Philippine Embassy sa Damascus sa miaging tuig.
Si Guiao nga lumad nga taga barangay Langtad lungsod sa Argao mibisita kang Gobernador Garcia sa Kapitolyo sa miaging adlaw.
Sa ilang panagtagbo gibasa ni Deputy Speaker ug 2nd District Congressman Pablo Garcia ang House Resolution nga nagpasidungog kang Guiao ug miila sa iyang bayanihong buhat.
Ang pasidungog ihatag kang Guiao sa Governor’s Ball nga kabahin sa 443rd Founding Anniversary Celebration sa kagamhanan sa lalawigan sa Sugbo unya sa Agusto 10 niining tuiga.
Si Provincial Legal Office Officer in Charge Marino Martinquilla gitahasan ni Gobernador Garcia paghimo sa governor’s commendation ug ipadangat sa hunta probinsiyal sa Sugbo aron pormal nga mapasar ang resolusyon nga mag-ila sa maayong nabuhat ni Guiao.
Si Guiao milakbit- saysay sa iyang kasinatian pagluwas sa mga OFW nga natanggong sa kagubot didto sa Syria.
Kahinumdoman nga nahibalik si Guiao ug laing siyam ka mga OFW nganhi sa nasud niadtong miaging Marso niining tuiga.
Sa pagbisita ni Guiao sa Kapitolyo nakadawat usab siya og pahalipay nga cash gikan sa governor .
Si Guiao tulo ka tuig nga nagtrabaho isip caregiver sa Syria nga nagdawat lamang og 150 ka dolyar matag buwan ug nag-alima sa usa ka tiguwang babaye sa Homs.
Karong Septembre niining tuiga, moadto siya sa Switzerland aron mamulong ug mosaysay sa iyang kasinatian bahin sa kinabuhi sa mga OFW. (BANAT NEWS)