Pagsakmit sa pinabuthang isda gikalipay ni Gwen

CEBU, Philippines - Gidayeg ni Governor Gwendolyn Garcia ang malampusong kampanya sa task force nga iyang gitugyanan sa pagpanakop sa mga produkto sa kadagatan nga nakuha pinaagi sa ilegal nga panagat.

Kini sa dihang nakasakmit sa mikabat sa duha ka kahon nga nagkalainlaing isda nga pinabuthan ang mga sakop sa Cebu Provincial Anti-Illegal Fishing Task Force (CPAIFTF)   didto sa dakbayan sa Danao sa miaging adlaw.

Gibutyag ni Rodillo Codilla, fish examiner sa CPAIFTF nga atol sa iyang pag-eksamin sa maong mga isda, iyang nasuta nga positibo kini nga nakuha pinaagi sa dinamita tungod sa mga timailhan sa lawas niini.

Matud niya nga pipila sa mga timaan nga pinabuthan ang isda mao ang kapuwa sa mata niini bisan og lab-as kini ug ang pagpanggawas sa tinai nga magpakita sa ilang pinugos nga kamatayon.

Gitug-an ni Codilla nga iyang gibanabana nga mokabat sa P6 mil ang balor sa   maong mga isda nga gisulod sa duha ka kahon. Ang maong mga kahon nasakpan ni Codilla ug kaubanan sa dihang ilang gipara ang usa ka trak de karga nga may plakang MF431 nga mibiyahe gikan sa barangay Mahawak, lungsod sa Medellin paingon na unta sa kamerkadohan sa dakbayan sa Sugbo. Subay sa naandan na, ang maong mga isda ipanghatag ngadto sa balay sa kalooy, sama sa Sisters of Mary ug uban pa.

Ang hugot nga kampanya batok sa pinabuthang isda maoy usa sa mga solusyon nga giugmad ni Gobernador Garcia uban sa gitukod niyang CPAIFTF aron maluya ang mga dinamitero sa pagpadayon sa ilegal nga matang sa panagat.

Matag kalampusan nga makab-ot sa maong grupo dili tiaw ang kalipay nga bation sa gobernador sa lalawigan sa Sugbo kinsa nagtinguha nga hingpit nang masulbad ang maong problema sa kadagatan dinhi sa lalawigan. (/WC)(BANAT NEWS)