Tanod nga gun for hire namatay sab

CEBU, Philippines - Ang kauban sa tanod nga giingong gun-for-hire namatay usab pipila ka gutlo didto sa Vicente Sotto Memorial Medical Center niadtong Biyernes sa gabii.

Siya si Rommel Camasura kinsa kauban ni Abundio Labitad, pulos mga tanod sa barangay Lawaan III, dakbayan sa Talisay kinsa gipamusil sa upat ka wala mailhing mga kriminal niadtong Biyernes sa gabii sa Ruiz Compound, barangay Tabunok, sa maong dakbayan.

Si Labitad kansang nawong natusak sa mga bala patay na nga naabot sa Talisay City District Hospital samtang si Camasura gidala ngadto sa Vicente Sotto Memorial Medical Center sa dakbayan sa Sugbo nga buhi pa, apan nasuta nga nabugtoan usab kini sa kinabuhi paglabay sa pipila ka gutlo didto sa maong tambalanan.

Sayo niini si Labitad ug Camasura gisuspetsahang may kalabotan sa pagpusil angol kang PO3 Arnold Damasco didto sa barangay Lower Mohon niadtong Biyernes sa 3:45 sa hapon.

Unya duha ka oras human sa maong hitabo si Labitad ug Camasura mao na usab ang gipamusil sa wala hiilhing mga kriminal.

Samtang si Supt. Eddie Recamara, hepe sa kapolisan sa Talisay mibutyag nga lima ka tawo ang responsabli sa pagpamusil kang Damasco base sa mga report nga ilang nadawat diin giingong kauban sa grupo sila si Labitad ug Camasura nga giingong pulos mga gun-for-hire.

Hinuon ang maong pasangil gipanghimakak ni Vita Labitad, asawa ni Abundio.

Matud pa ni SPO1 Mikie Espina nga bisan og si Labitad ug Camasura mga suspetsado sa pagpamusil kang Damasco nagpahigayon usab sila og lawom nga imbestigasyon niini ug nagpaabot usab sila sa pamilya sa duha ka mga biktima nga makighinabi kanila sa ilang buhatan.

Gidudahan sa kapolisan sa Talisay nga ang pagpusil kang Damasco may kalabtanan sa gidiling drugas gumikan sa kadaghang gisum-ok niini nga kampo sa mga negosyante og illegal drugs sa Talisay. 

Matud ang hulga sa kinabuhi ni Damasco nagsukad human niya sikopa ang suspetsadong pusher nga si Albert Salem alyas “Apar” ug “Migo” sa sitio Galaxy, barangay Tanke.

Gumikan niini si Recamara nagkanayon nga higpit silang mabinatayon karon aron wala nay laing mabiktima pa kanila. (BANAT NEWS)