CEBU, Philippines - Ang kakuwang og kahimanan ingon man ang posibleng binuang pagpahigayon og smoke emission test maoy hinungdan nganong daghan gihapong motor vehicles nga magbuga og itom kaayo nga aso apan padayon kini nga nagdagan sa mga karsada.
Nasayran sa Banat-Manobela nga ang mga road law enforcers wala tuguti pagdakop sa usa ka motorista bisan pa og klaro kaayong makita nga ang sakyanan nga iyang gimaneho nagbuga og itom nga aso.
Kadto rang mga kawani nga nadestino sa ekipo nga mosukod sa aso nga ibuga gikan sa makina maoy gitugotan nga moisyu og mga apprehension papers sa mga drayber sa smoke-belching vehicles.
Si Land Transportation Office (LTO)-7 regional director Raul Aguilos mipasabot nga kun ang mga road law enforcers sama sa deputized agents sa LTO manakop abi kay nakita nila nga itom ang aso sa sakyanan, mahimo man gud kini nga lalison sa drayber.
Daghan ang nakabantay nga daghang mga sakyanan nga ang makina gipaandar gamit ang krudo maoy sagad mobuga og itom kaayo nga aso, bisan pa man og bag-o kini nga girehistro.
Ang smoke emission test results usa sa gikinahanglan nga dokumento aron ang usa ka sakyanan ma-renew og rehistro. Apan nabantayan nga bisan kadtong mga sakyanan nga itom kaayo og aso makapasar man gihapon sa smoke emission test.
Nasuta usab nga dili parehas ang presyo nga pangayo sa mga smoke emission testing centers nga accredited sa LTO sanglit dunay P300 ug ang uban P400.
Mga opisyal sa Department of Health (DOH) nagkanayon nga ang paghanggab og aso nga gikan sa makina makadaot sa panglawas sa tawo, ilabi na kun ang maong tawo hubakon.
Dunay usa ka pagtoon nga daghang mga drayber nakabaton og mga sakit sa baga tungod sa kanunay’ng paghanggab og aso sa sakyanan tibuok adlaw.
Ang dakbayan sa Sugbo adunay ordinansa nga naglatid nga ang City Traffic Operations Management (CITOM) kinahanglang mopaspas sa paghimo’g kampanya aron mawagtang na ang mga sakyanan nga magbuga og itom nga aso.
Apan nabantayan nga bisan ang mga ahensya sa gobiyerno migamit gihapon og mga kagangkagang nga mga sakyanan nga nagbuga og itom nga aso ug gipasagdan lang sa mga road enforcers.
Ang pagbuga og itom nga aso sa usa ka sakyanan maoy timailhan nga ang makina depektoso na ang piston ring ug ang “oil” sa makina mosulod na sa cylinder maong itom na ang ibugang aso niini. (BANAT NEWS)