Natural gas nagpasuga sa Bogo - Salimbangon

CEBU, Philippines - Nakatabang kaayo sa panginahanglan sa sugang dagitabnon   ang tinubdan sa natural gas sa barangay Libertad, dakbayan sa Bogo, sa maong dakbayan sumala pa ni Kongresista Benhur Salimbangon sa ika-upat nga distrito sa lalawigan sa Sugbo.

Atol sa tulomanon Tapok-Tapok sa Sugbo si Salimbangon kinsa usa sa miyembro sa committee on energy sa ubos balay balaoranan nagkanayon nga ang tinubdan sa natural gas sa Bogo, mao karon ang gigamit pagpaandar sa makinarya nga nag-supply og sugang dagitabnon sa siyudad sa Bogo.

Si Salimbangon kinsa midayeg usab kang Mayor Celestino Martinez Jr. sa maayong pagdumala sa maong planta sa natural gas nagkanayon nga ang maong proyekto, usa sa mga kalamposan sa   programa sa Department of  Energy (DOE) sa natad sa   paningkamot niini nga makadiskobre og dugang tinubdan sa asayte sa nagkalainlaing dapit sa nasud.

Apan dinhi sa Kabisay-an daghan na ang mga lugar nga gihimoan og pagtuon sa DOE sa pagpaniid kun may igo ba kining tinubdan sa asayte.

Kini sa tinguha sa maong    ahensya sa kagamhanan nga matibhangan ang pagsalig sa nasud gikan sa mga produkto ug supply   sa asayte nga gikan sa gawas sa nasud.

Hinuon sumala ni Salimbangon nga base sa mga pagtuon, ang supply sa natural gas sa Libertad, Bogo may limitasyon.

Maoy hinungdan nga walay puas ang DOE sa paghatag og otorisasyon sa mga oil digger nga gustong   modiskobre og mga tinubdan sa lokal nga asayte dinhi. Sa isla sa Bantayan, may kompaniya karon nga gihatagan og otorisasyon sa DOE pag-survey sa posibling tinubdan usab sa natural gas, matud pa ni Salimbangon. Ang kongresista sa ika-upat nga distrito sa lalawigan sa Sugbo kinsa kanhi assistant chairman sa Cebu Electric Cooperative (CEBECO) mabalak-on kaayo bahin sa kahimtang sa supply sa sugang dagitabnon dinhi sa lalawigan.

Matud pa niya nga sa iyang distrito, tanang mga barangay bisan pa kadtong tua sa tumoy sa tag-as nga bungtod, gipakutayan niya og linya sa kuryente alang sa panginahanglan sa suga sa mga molupyo sa maong mga lugar. (BANAT NEWS)