Sinkhole sa srp way ayo

CEBU, Philippines - Walay nalantawan nga kaayohan ang mga tinugyanan sa kalikopan bahin sa gilaraw nga water catchment   o huyonghuyong nga tukoron sa South Road Properties (SRP) .

Mao kini ang reaction ni Engr. Al Emil Berador, Chief Geologist sa Mines and Geosciences Bureau (MGB) sa Deparment of Environment and Natural Resources (DENR) bahin sa nahunahunaan ni Konsehal Roberto Cabarrubias sa dakbayan sa Sugbo nga magtukod og sink hole sa SRP aron maoy pundohan sa tubig  sa uwan nga molunop sa mga kadalanan sa siyudad   sa panahon nga mobundak ang uwan. Matud pa ni Berador nga daghang subayonon nga mga butang sa ilawom sa yuta sa SRP kalabot ning maong plano.

Ang SRP usa ka business area busa kasagaran sa mga itarok nga mga edipisyo ug estraktura sa maong lugar mga dagko ug nagkinahanglan og lig-on nga pundasyon.

Kun ang huyonghuyong nga kawoton sa maong dapit gitumong aron kapundohan og daghang tubig, may posibilidad nga mohumok ang mga bahin sa palibot ug kasikbit niini, busa delikado kaayo kun mohulpa ang mga lugar nga tarokan og mga dagkong building.

Ang SRP usa ka reclamation area kansang yuta    inabuno lamang busa walay bantilis nga pundasyon sa kinailawman niini.

Busa matud pa ni Berador   nga angay tun-an    pag-ayo sa mga naglaraw sa maong sink hole una nila kini ipatuman aron kalikayan ang dili maayong sangputanan, sumala ni Berador. Ang tubig sa uwan motabon sa mga kadalanan sa dakbayan gumikan sa kakuwang sa imbornal.

Usa sa hinungdan nga wala kini kailisi og mga dagkOng imbornal mao ang kakuwang sa budget   busa ang karaan ug gagmay nga imbornal napuno na usab sa basura   hinungdan nga matag bundak sa uwan murag dagat ang kadalanan sa siyudad. (BANAT NEWS)