100-days countdown sugdan karong adlawa

CEBU, Philippines - Sugdan na karong adlawa ang 100-days countdown alang sa nagsingabot nga canonization ni Blessed Pedro Calungsod nga gitakda sa Oktobre 21 didto sa Vatican City.

Liboang mga deboto ang gipaabot nga mosalmot karong adlawa sa maong countdown diin gipaabot nga mamahimo nang santos ang Bisaya nga si Blessed Pedro Calungsod kinsa mao usab ang ikaduhang Filipino nga mahimong santos sa kasaysayan.

Ang maong kalihukan sugdan sa usa ka Santos nga Misa nga pangulohan mismo ni Archbishop Emeritus Ricardo Cardinal Vidal karong alas-2 sa hapon didto sa Basilica Minore Del Sto.Niño.

Human niini, usa ka motorkada ang himuon gikan sa Basilica paingon sa Fuente Osmeña Circle diin usa ka programa ang ipahigayon nga tambungan usab ni Cebu Archbishop Jose Palma.

Gawas sa paghatag og mensahe ni Palma, atangan usab ang pagdalit og awit sa Commission on Youth nga maoy mokanta sa Gozos. Dili lang usab ang Archdiocese sa Sugbo ang mopahigayun og countdown sa canonization ni Calungsod, tungod kay gikatahong maghimo usab og kaugalingong 100-days countdown ang mga Archdiocese didto sa kaulohan.

Sa laing bahin, gipahibalo ni Palma nga moabot na sa 900 ka mga katolikong deboto ang mouban sa pilgrims didto sa Vatican aron usab mosaksi sa canonization ni Blessed Calungsod. (BANAT NEWS)