Mipusil sa polis gipamusil sad

CEBU, Philippines - Patay diha-diha ang usa ka tanod sa barangay Lawaan III, dakbayan sa Talisay samtang kritikal ang kahimtang sa kauban niini human sila pamusila sa upat ka wala mailhing mga lalaki niadtong Huwebes sa mga alas 6:30 sa gabii diha sa Ruiz Compound, barangay Tabunok, dakbayan sa Talisay.

Ang maong insidente ikaduhang pagpamusil diha sa maong dakbayan niadto lang adlawa, una niini mao ang pagkapusil ug pagkaangol sa polis nga si PO3 Arnold Damasco, sakop sa Talisay City polis.

Ang gitusak og bala sa nawong mao si Abundio Labitad, 49, samtang talandugon ang kahimtang sa kauban niining si Rommel Camasura kinsa gidala sa Vicente Sotto Memorial Medical Center tungod sa mga igo sa bala sa kalawasan.

Na-recover sa mga polis gikan sa lugar nga nahitaboan ang 13 ka kabhang sa mga bala sa kalibre .45 nga pistola ug usa ka deformed slug.

Si Supt. Eddie Recamara, hepe sa Talisay City Police Station sa pakighinabi niini sa mga tigbalita kagahapon mibutyag nga base sa mga report nga ilang nadawat si Labitad ug Camasura giingong mga guns-for-hire.

Dugang pa sa ilang impormasyon nagduda silang may kalambigitan ang duha sa pagpamusil kang PO3 Arnold Damasco kauban sa laing tulo ka wala pa mailhing mga lalaki nga mibanhig sa maong polis diha sa barangay Mohon sa maong dakbayan.

Matud pa ni Recamara nga sa dugang imbestigasyon nila sa pagpusil kang Damasco lima ka guns-for –hire ang mihimo niini.

Gitutukan sa imbestigasyon sa pagpusil kang Damasco mao ang anggulo sa illegal nga drugas tungod kay human madakpi ang notadong drug pusher sa Tangke nga si Albert Salem alyas “Apar” ug “Migo” si Damasco maoy nag- case buildup niini ug sukad niadto kanunay nang makadawat og hulga sa kinabuhi ang maong polis.Si Labitad ug Camasura giingong maoy nagsilbing mga look-out ug ang tulo nila ka kauban giingong milahos ngadto sa Minglanilla. Tungod niini mitumaw ang pagdudang sakop sa gobiyerno ang mipusil nila ni Labitad ug Camasura apan giklaro ni Recamara nga dunay imbestigasyong gihimo bahin niini. Si Recamara nagkanayon nga si Labitad usab maoy kauban ni Tommy Echavez nga suspek sa pagpamanhig sa asawa ni Atty. Raul Sesbreño pipila na ka bulan ang milabay. Si Echavez napusilan ug nadakpan na sa kapolisan pipila na ka bulan ang milabay.

Si Kapitan Deliah Ybañez sa iyang bahin miingon nga wala siya masayod sa mga personal nga lakaw ni Labitad kinsa lima ka tuig na nilang tanod.

Gibutyag usab ni Ybañez nga lumad nga taga barangay Buot-Taop bukirang barangay sa dakbayan sa Sugbo si Labitad ug kini kanhi political detainee kaniadto. (/EIM)  (BANAT NEWS)