6 ka sikyu gisakmita'g armas

CEBU, Philippines - Unom ka security guard sa nagkalainlaing establisamento sa dakbayan sa Talisay gibawian og mga service firearms sa Firearms and Explosives, Security Agencies Guards Supervision Section (FESAGS) tungod kay walay mga lisensya.

Si Superintendent Eddie Recamara, hepe sa Talisay City Police Station, mibutyag sa Banat News nga ang pagpanakmit sa maong mga armas gihimo atol sa   spot inspection nga gipahigayon sa FESAGS sa unom ka mga establisamento sa siyudad sa miaging semana diin ilang nasuta nga ang mga armas sa unom ka guwardiya pulos    walay lisensya ug permit to carry.

Busa ang gihimo sa taga FESAGS mao ang pagsakmit sa maong mga armas matud pa ni Recamara. Kasagaran sa maong mga security guard gituohan usab nga kuwang sa training busa pulos walay alamag sa mga basic procedure kon tukmang mga pamaagi   sa paghupot og armas.

Midugang ang hepe nga ang ubang mga establisamento sa Talisay motahas og daghang trabaho sa ilang mga guwardiya    sama sa pagka-tigsira sa mga pultahan sa mga tindahan ug ingon pagbantay sa trapiko sa    parking area sulod sa hurisdiksyon sa gibantayan nilang puwesto.

Apan matud pa ni Recamara nga dili na unta angayan pang sangonan og laing mga trabaho ang mga guwardiya aron makaatiman sila pag-ayo sa mga tawong dautan nga buot momugna og krimen sa palibot sa ilang gibantayan.

 Sa maong sistema karon nga gisagop sa mga negosyante giisip nila nga boy-boy    ang ilang security guard ug wala na kini mahisubay sa hustong lagda ug sumbanan bahin sa katungdanan sa usa ka security guard, matud pa ni Recamara.

Midugang siya nga may mga establisamento sa Talisay sama sa mga gasoline station nga walay mga armas ang ilang mga security guard.

Unya kun may armas man, wala usay mga lisensya ug permit to carry, sumala pa ni Recamara.

Busa giawhag ni Recamara ang mga tag-iya sa mga balay patigayon sa dakbayan nga kun mag-hire og security guard kinahanglang pilion kadtong may hustong training nga gikan sa mga ahensiya nga aprobado sa Philippine National Police (PNP).

 Sa laing bahin, matag balay patigayon karon sa Talisay may mga email address na kay mao kini gihisgotan nila sa ilang panagtagbo sa miaging semana nga gitambongan sa 38 ka mga manager.

Pinaagi niini dali nilang ikapahibawo sa kapolisan kun makadawat sila og mga hulga gikan sa mga dautang tawo.  (BANAT NEWS)