Coliform bacteria nakita sa tubig sa Badian

CEBU, Philippines - Positibo sa kagaw sa tubig nga gitawag og coliform bacteria ang tinubdan sa tubig sa lungsod sa Badian nga miresulta sa kalibanga sa kabataan sa barangay Tubod.

Kini ang gipahibawo ni Dr. Cristina Giango, ang hepe sa Integrated Provincial Health Office (IPHO) human sa ilang pakisusi nga gihimo.

Hinuon matud pa ni Giango nga mahimo nga mogamit og balik sa pagkakaron sa tinubdan sa tubig nga gidudahang maoy gitakbuyan sa maong kagaw human sa gihimong chlorination.

Sayo niini, si Giango nagduda gyud nga tubig ang hinungdan sa maong sakit human nakita ang nangliki nga tubo sa tubig atol sa gihimong inspeksiyon.

Pasiunang pakisusi nasayran nga ang mga biktima nga kadaghanan mga tinun-an sa Tubod Elementary School nakakaon og mga pagkaon nga gibaligya gawas sa tunghaan nga giingong walay sanitary permit.

Matud pa ni Giango nga dili sa pagkaon ang hinungdan sa sakit sanglit gawas sa mga tinun-an, adunay pipila ka mga biktima nga mga residente sa dapit nga dili mga tinun-an.

Kagahapon, napulo na lang ka mga pasyente ang nagpabilin sa Badian District Hospital sa 44 ka mga na-admit.

Gideklarar ang diarrhea outbreak sa lungsod sa Badian human niabot og 133 ka kaso ang natala sa mga tinugyanan sa panglawas. (BANAT NEWS)