Polis sa talisay gipusil

CEBU, Philippines - Nalandig sa tambalanan ang usa ka polis nga nadestino sa Talisay City Police Station (TCPS) human kini pusila sa wala mailhing lalaki nga nag-angkas sa motorsiklo kagahapon sa alas 3:45 sa hapon diha sa barangay Lower Mohon, dakbayan sa Talisay.

Rob leader nadakpan sa Zamboanga del Norte

Human sa usa ka tuig niini nga pagtagotago nadakpan na ang gitumbok nga lider sa robbery group nga mitulis sa usa ka teller sa bangko diha sa Robinsons Mall niadtong buwan sa Septiyembre sa miaging tuig.

Si Junjun Cabando, nasikop sa mga sakop sa Regional Intelligence Division sa Sindangan, Zamboanga del Norte apan kasamtangang nagpuyo sa Tinayupan, Piayan, Zamboanga del Norte.

Sa pakighinabi sa mga tigbalita ni RID deputy director Supt. Paul Labra mibutyag kini nga natultulan si Cabando sa ilang mga asset diha sa mga paryente niini sa Piayan.

Wala hinuon mosukol pa si Cabando dihang gidakop nila sa Sindangan. Adunay warrant of arrest gikan ni RTC-Branch 19 Wilfredo Navarro tungod sa kasong 2-counts of Robbery with homicide, frustrated homicide ug robbery with physical injuries si Cabando.

Nasayran nga niadtong buwan sa Septiyembre tuig 2011 ang kauban ni Cabando nga silang Mario Dapitan, Antonio Adelan ug Nelson Magsanay, misuway unta sa pagtulis dalang P1.2 milyon sa teller sa China Bank nga nagkuha ug kwarta sa Robinsons Mall sa Fuente Osmeña ning dakbayan.

Apan nanukol ang mga armored van escorts nga sila si Lito Odac ug Leofer Otac kinsa parehong napatay sa mga tulisan ug nakaangol sa duha ka polis nga silang PO1 Elrich Jourdin Catacutan ug PO1 Roy Ceniza. Gidemalas hinuon ang mga tulisan tungod kay tulo sa mga kauban niini ang nakalas sa ginukdanay sa mga polis nga miresulta usab sa pagkaangol ni Cabando apan nakaipsot kini gawas sa Sugbu luwan sa usa ka giabangang pumpboat diha sa dakbayan sa Talisay kauban ang uyab niining nurse.  (BANAT NEWS)