CEBU, Philippines - Ang EDSA People Power Commission (EPPC) naglaraw nga magtukod dinhi sa Sugbo og sanga nilang buhatan aron maoy manguna sa mga kalihukan nga magpalig-on sa demokrasya sa nasud.
Kini maoy gipasabot ni Emily Abrera ang Commissioner sa EPPC kinsa miduaw sa buhatan ni Gobernador Gwendolyn Garcia sa Kapitolyo sa miaging adlaw. Si Abrera mipahibawo sa gobernador kalabot sa tahas nga gipatong sa ilang buhatan kansang tumong mao ang pagpalig-on sa demokrasya sa nasud subay Executive Order No. 82.
Matud pa ni Abrera nga gusto nila nga ingon niini ang himoon sa provincial level sa EPPC dinhi sa lalawigan nga samtang layo pa ang kasaulogan sa people power revolution unya sa Pebrero 25, 2013, maumol na ang nagkalainlaing kalihokan dinhi sa Sugbo aron ikapasundayag sa maong higayon.
Midugang siya nga ang Sugbo takus kaayo nga mosalmot sa mga dagkong kalihokan sa people power revolution anniversary tungod kay ikaduha kining labing dako nga dakbayan sa tibuok nasud. (BANAT NEWS)