CEBU, Philippines - Gipaabot nga mokita ang kagamhanan sa lalawigan sa Sugbo og P15 milyones sa ipahigayon niining ika-lima nga One Cebu Expo karong Agusto sa Cebu International Convention Center (CICC) sa siyudad sa Mandaue.
Sumala pa ni Ian Fresnido sa Secretariat Office sa One Cebu Expo nga ang maong kantidad maoy ilang target nga kab-uton gikan sa Agusto 3 hangtud sa Agusto 13 ning tuiga.
Matud pa niya nga usa sa nakapasiguro nila nga makabaton kini og katumanan mao ang pagdagsang sa kapin sa 300 ka mga exhibitor sa maong kalihokan nga maggikan dinhi sa Sugbo ug sa ubang mga probinsiya base sa listahan sa nagparehistro na sa ilang buhatan sa mga mosalmot sa 5th One Cebu Expo.
Midugang si Fresnido nga mas daghan karong tuiga ang mosalmot nga mga gagmay nga mga magpapatigayon sa pagkaon, ingon mga negosyante og mga kahimanan kun itandi sa misalmot sa maong expo sa miaging tuig.
Gani matud pa niya nga nagpadayon pa karon ang ilang registration sa mga mosalmot sa maong kalihukan
Iya usab nga gipahibawo nga may 100 sila ka luna nga gitagana alang sa dugang pang mga magpapatigayon nga mao pay pagsalmot og mga kalihukan nga susama niini.
Sa samang higayon may mga lakang usab sila nga gihimo aron hugopan sa katawhan ang maong expo.
Kahinumdoman nga gimugna mismo ni Governor Gwendolyn Garcia ang One Cebu Expo sa tumong nga matabangan ang mga negosyante nga makapasud-ong sa katawhan sa mga nagkadaiya nilang produkto. - BANAT NEWS