"Hot Meat" gisakmit, vendor hayan tangtangon

CEBU, Philippines - Gisakmit sa mga sakop sa Department of Veterinary Medicine and Fisheries (DVMF) pasado alas-5 kagahapon sa kaadlawon ang mga imported nga karneng baboy nga nagkuwang ang mga papeles ug sayop ang pag-atiman niini.

Base sa talaan sa DVMF moabot ngadto sa kapin sa 50 ka kilo nga karneng baboy ang ilang nasakmit ug 10 niini linapwaan na og init tubig.

Sumala pa sa pangulo sa DVMF nga si Dr. Alice Utlang nga pakyas ang tag-iya sa karne nga si Julie Cabangangan sa pagpakita og sertipikong nagtugot niini nga makabaligya og imported nga karne.

Dunay nahitabong ginukdanay tali sa mga sakop sa DVMF ug sa mga trabahante ni Cabangangan human giingong misutoy og padagan ang sakyanan nga gikargahan sa maong mga karne sa mga monitoring team. Gikan sa Carbon Unit 1, didto na naabti sa DVMF duol sa Cebu City Hall ang mga tawo ni Cabangangan nga usa ka Starex Van.

Gawas nga nagkuwang ang certificate, dili usab haom ang sakyanan nga gibutangan sa karne sanglit kinahanglan kini nga ikarga og refrigerated van o dunay freezer, o ba kaha ice box nga dunay mga ice ang maong mga karne.

Tungod sa maong kalapasan girekomendar sa DVMF ngadto sa Cebu City Market Authority nga tangtangon si Cabangangan sa iyang puwesto sa Carbon Market Unit 1 tungod kay matud pang Utlang unom na ka higayon nga gilapas sa maong vendor ang mga patakaran sa pagpamaligya og karne. (BANAT NEWS)