Sunog sa Lapu P250 mil danyos

CEBU, Philippines - Mokabat sa P250,000 ang gibanabanang danyos sa sunog nga miugdaw sa tulo ka balay didto sa barangay Punta Ingano sa dakbayan sa Lapulapu sa miaging gabii.

Si SFO1 Atelano Beredo, imbestigador sa kabomberohan sa maong dakbayan nga nahinabi sa Banat News miila sa mga panimalay nga nasunog nga gipanag-iya sa pamilyang Manuel ug Mila Baring, Victor Pangubo ug Marlon Baring. Matud pa ni SFO1 Beredo   nga ang kayo didto magsugod sa balay sa magtiayong Manuel ug Mila Baring.

Midugang si SFO1 Beredo nga dali usab nga mitabang pagpawong sa maong sunog ang ubang kabomberohan dihang gipaubos nila kini sa second alarm .

Pipila sa nahiabot didto mao ang Marigondon Fire Station, Gun-ob Fire Station, Poblacion ug Babag Fire Station.

Gitataw ni SFO1 Beredo nga ilang nakontrolar ang kayo sulod sa walo ka minutos ug walay naangin nga kinabuhi

Padayon pang gisusi sa kabomberohan ang hinungdan sa maong sunog.

(BANAT NEWS)