CEBU, Philippines - Kritikal ang kahimtang sa usa ka polis human madasmag sa gutter dayon natagak sa kanal ang iyang motorsiklong gisakyan didto sa highway sa Sitio Gahad, barangay Poblacion, sa lungsod sa Sibonga niadtong Lunes sa gabii.
Ang nalandig sa tambalanan mao si PO1 Kenneth Bandong, 34 , minyo, nga taga San Jose Village siyudad sa Talisay ug nadestino sa Talisay City Police Office.
Si SPO3 Zacaris Cabaluna sa Sibonga Police Station mibutyag sa Banat News nga gikan sa siyudad sa Talisay ang biktima ug paingon unta kini sa lungsod sa Argao sakay sa iyang motorsiklo nga Yamaha Meo nga adunay plaka nga YC-7608.
Apan samtang nagpadagan sa iyang motorsiklo kalit lang kining nawad-an og preno pag-abot sa kurbadang bahin duol sa sementeryo sa maong lugar hinungdan nga nawad-an siya og kontrol sa sakyanan ug midaro kini sa gutter sa karsada apan milayat ug mitugpa kini sa lawom nga kanal.
Nalabay ang polis ug nagbuy-od kini sa yuta dihang gisakwat sa mga tawo ug gihatud ngadto sa Carcar City District Hospital apan gipalahos kini ngadto sa South General Hospital sa siyudad sa Naga. (BANAT NEWS)