Barkong nalunod gihimulbolan

CEBU, Philippines - Gipasusi ni Lapulapu City Mayor Paz Radaza sa Philippine Coast Guard (PCG) ang taho nga gihimulbolan sa wala hiilhing mga kawatan sa mga piyesa ang barkong nalunod sa barangay Canjulao dakbayan sa Lapulapu nga nagkarga og 23 mil ka sakong semento.

Kini human masayri sa mayor gikan kang Andy Berame sakop sa Task Force Kalikasan (TFK) nga matud pa ang angkla ug radar antenna sa M/V B E I nawagtang na.

Gumikan niini mimando si Radaza   nga pabantayan og dugang mga tawo ang   maong lugar aron masanta ang mga kawatan.

Samtang gipahibalo ni Luzviminda Bato ang Chemist sa Bureau of Fisheries and Aquatic Resources (BFAR) atol sa press conference kagahapon nga walay angay kabalak-an ang mga mananagat sa mga barangay nga duol sa nalunoran sa maong barko kay migahi na ang mga semento   sa ilawom sa dagat ug dili na kini makaapekto sa mga isda sa maong dapit.

Hinuon ang gikabalak-an ni Bato mao ang oil spill o pagdahili sa asayte gikan sa tangke sa maong barko

Apan si Engr. Roderico Tagaan sa CENRO sa dakbayan sa Lapulapu mipasabot   nga sa ilang pagsusi sa maong dapit wala pa silay nakitang oil spill.

Sayo niini si Radaza mihangyo kang Benjamin Go nga maoy tag-iya sa maong barko sa pag-ugkat sa maong sakyanan uban ang pasidaan nga kun mapakyas siya pasakaan siya og kaso ngadto sa hukmanan.

Ang maong barko nalunod niadtong Hulyo 1, ning tuiga dihang   nasangad kini sa mabaw nga bahin sa dagat gumikan sa kabug-at sa karga   nga 23 mil ka sakong semento. (BANAT NEWS)