CEBU, Philippines - Ang Regional Development Council (RDC-7) milig-on og resolusyon sa mga Local Government Unit (LGU) sa pagpili sa bag-ong permit ug licensing program nga makapalambo sa buhis sa 40 ka mga LGU sa rehiyon. Sumala pa ni Department of Trade and Industry (DTI) 7 Regional Director Asteria Caberte nga ang programang Business Permits and Licensing System (BPLS) makapaminus sa oras sa pagkuha og business permit ug makapawagtang usab sa kahigayonan sa pagpangawkaw ug kurapsyon.
Dugang pa niya nga kini maoy katuyoan sa kagamhanan sa pagpataas sa lokal nga buhis.
Ang maong programa nagsugyot og mga panukdanan alang sa BPLS nga angay tumanon sa mga LGU, pagpalambo og mga programa alang sa BPLS , pag-organisar og rehiyonal nga mga kauban sa departamento aron sa pag-implementar sa mga reporma sa BPLS. Ang maong sistema nagpamubo sa oras sa paghikay sa mga aplikasyon alang sa business permit ug lisensya nga adunay gitas-on nga napulo ka adlaw kung kini mogamit og unified application form. Nagpaminus usab kini sa mga lakang sa pag-renew sa permit ug lisensya.
Si Caberte mibutyag nga ang DTI ug ang Department of Interior and Local Government (DILG) 7 sa sayo pa mipirma og joint circular alang sa implementasyon sa BPLS sa tanang LGU sa nasud.
Dugang pa ni Caberte nga ang 40 ka LGU nga misagop sa BPLS malampusong mipasaka sa buhis sa ilang bag-ong business registration ug mga renewal, ug misugyot sa ubang LGU sa boluntaryo niining pagsagop sa BPLS sa ilang tagsa-tagsa ka dapit. Gitataw ni Caberte nga sa syudad sa Sugbo ang 60-working day time frame alang sa paglig-on sa business permit mahuman lamang sa pipila ka adlaw. Giklaro ni Caberte nga pinaagi sa aksyon sa RDC, kini makatabang sa pagmatuto sa nasudnong target alang sa pagpauswag sa kinitaan sa buhis sa tanang LGU sa umaabot nga tuig 2015. (BANAT NEWS)