2 konsehal sa oposisyon sa Talisay maoy pilian

CEBU, Philippines - Duha sa tulo ka mga incumbent nga konsehal sa dakbayan sa Talisay nga ubos sa landong sa oposisyon ang posibleng maoy magpares aron modagan isip mayor ug bise mayor sa eleksiyon sunod tuig. Si Konsehal Romeo Villarante nga ubos sa landong sa Liberal Party sa pakighinabi niini sa Banat News nagkanayon nga mopahigayon una sila og konsultasyon ngadto sa mga Talisaynon.

Apan kung wala gyu’y modagan isip mayor ug bise mayor sa Talisay posibleng duha kanila sa oposisyon ang magpares, kini mao sila si Konsehal Val Ylanan ug Danny Caballero.

Gibutyag ni Villarante nga makigtagbo pa sila sa ilang lider sa LP sa probinsiya nga si Hilario “Jun Jun” Davilde III uban kang San Fernando Mayor Antonio “Abe” Canoy diin hisgutan nila ang maong plano. Si Kongresista Eduardo Gullas sa unang distrito sa probinsiya sa Sugbo ug last termer na karon mibutyag nga modagan kini pag-usab isip mayor sa Talisay pares ang incumbent nga bise mayor nga si Alan Bucao.

Si Villarante nagkanayon nga dili usab motugot ang mga Talisaynon nga walay moatbang kang Gullas sa umaabot nga eleksiyon. Matud niya nga nagkinahanglan usab nga dunay laing kandidato nga mapilian ang katawhan. (BANAT NEWS)