Koalisyon sa NP ug LP tukma lamang

CEBU, Philippines - Si Kongresista Eduardo Gullas sa unang distrito sa probinsiya sa Sugbo ug executive committee member sa Nacionalista Party (NP) nagkanayon kagahapon nga ang koalisyon tali sa NP ug Liberal Party (LP) makatarunganon.

“It makes a lot of sense for the two parties to be aligned ahead of the mid-term elections. Looking way back, the LP used to be the ‘liberal wing’ of NP,” ni Gullas pa.

Matud sa Kongresista nga si kanhi presidente Manuel Roxas kinsa apohan ni Transportation Secretary Mar Roxas midagan pagka-presidente sa nasud niadtong tuig 1946 sa national election ubos sa landong sa LP nga liberal wing sa NP.

Giangkon ni Gullas nga ang alyansa sa LP, NP uban sa Nationalist People’s Coalition (NPC) naghimo kanilang lig-ong kaatbang.

Si Gullas kinsa kanhi usab gobernador sa probinsiya sa Sugbo mibutyag nga ang NP buot mohupot og upat ka senatorial slots diha LP-NP-NPC coalition unified senatorial ticket.

“We confirm that NP is asking four slots, with the first two going to Las Piñas City Representative Cynthia Villar and re-electionist Senator Alan Peter Cayetano,” matud sa Kongresista.

Si Senador Loren Legarda kinsa gihulagway ni Gullas nga “logical” reelectionist posibleng malakip sa senatorial lineup.

Kahinumduman nga si Legarda midagan kini isip bise presidente sa nasud pares ni Senator Mannuel Villar kinsa midagan isip presidente sa nasud niadtong tuig 2010. Si Villar maoy national president sa NP.

Matud usab ni Gullas nga angayan usab nga malakip si re-electionist Senador Francis Escudero sa coalition senatorial ticket tungod kay midaog kini niadtong 2007 sa una palang niining pagdagan isip senador ilawom sa tiket sa NPC.

Gipanglantawang sikit gyud ang umaabot nga 2013 elections tali sa LP-NP-NPC coalition ug sa United Nationalist Alliance (UNA).

Ang coalition tali sa partido ni kanhi presidente Joseph Estrada nga Pwersa ng Masang Pilipino (PMP) ug sa Bise Presidente sa nasud nga si Jejomar Binay nga Partido Demokratiko Pilipino-Lakas ng Bayan (PDB-Laban), UNA ang buot usab makabaton og pwesto sa senado.

“But actually, the NP alone is much larger than PMP, or PDP-Laban. We have more members in the Congress and in local governments,” ni Gullas pa kinsa midugang sa pagsulti nga “in the case of PMP, it has only three members in the House.

(BANAT NEWS)