Dakpon ang hugaw og plaka

CEBU, Philippines - Ang mga drayber sa lainlaing sakyanan mahimong sakmitan sa ilang lisensya sa pagmaneho kun dili nila limpyohan ang plate numbers sa sakyanan o kaha atimanon nga klaro kini nga mabasa kanunay.

Nabantayan sa mga sakop sa Land Transportation Office-Task Force Alpha (LTO-TFA) nga daghang mga sakyanan, ilabi na ang mga PUJ, hugaw kaayo ang plate numbers ug ang uban gani dili na mabasa.

Ang “dirty plates” usa sa kalapasan nga gimando sa Land Transportation Office nga nagtangag lang og gamay kaayo nga multa ngadto sa mga drayber. Apan aron dili mahasol kinahanglang atimanon sa mga drayber nga limpyo ang ilang plate numbers sa ilang sakyanan ilabi kun dunay napapas nga numero o ba kaha nabali ang pagkabutang niini.

Kadtong mga tag-iya o drayber sa mga sakyanan kang kansang plate numbers naputol, kinahanglan sila nga moadto sa LTO-branch diin ang ilang sakyanan marehistro aron mangayo sila og “authority” pagamit og “improvised plate.”

Base sa lagda sa LTO, gidili ang pagamit og improvised plate kun walay pagtugot nga sinuwat gikan sa LTO.

Gituyo kini aron nga mapugngan nga ang mga tag-iya og sakyanan mousab-usab sa ilang plate numbers. Ang usa ka sakyanan isyuhan lang og usa ka plate numbers gawas lang kun mausab ang iyang “classification” sama sa “private” ngadto sa “public utility.”

Sa mga motorsiklo, ang plate numbers kinahanglang anha gyud ibutang sa likud nga mag-atubang sa luyo aron makita sa magsunod, kung ibutang kini sa ubang bahin sa motorsiklo may multa kining P578. Bisan og ang plaka mag-atubang sa luyo apan tua gipasok ilawom sa ligid, dakponon gihapon kay panahon sa uwan, ang plaka mabulit sa lapok ug dili na makita ug mabasa.

Ang mga motorista nga masakpan nga mogamit og plate numbers nga dili maoy giisyu sa sakyanan awtomatikong ma-impound ang sakyanan ug mabawi ra kini kung makapakita og rehistro ang tag-iya ug makabayad sa multa. (BANAT NEWS)