Drug test sa estudyante ipatuman
CEBU, Philippines - Aprobado na sa Hunta Provincial sa lalawigan sa Sugbo ang committee report sa Chairman sa Committee on Education nga si Bokal Wilfredo Caminero kalabot sa random drug testing sa mga secondary ug tertiary nga mga estudyante sa tanang mga tulunghaan sa lalawigan.
Ang paglig-on gihimo atol sa out of town session sa mga miyembro sa Provincial Board didto sa lungsod sa Boljoon.
Ang maong committee report ni Caminero gihimo human itunol ngadto sa iyang komite ang gisugyot nga ordinansa ni Philippine Councilors League President nga si Ivy Durano Meca bahin sa gikinahanglang random drug testing sa tanang nagtungha sa high school ug sa kolehiyo.
Sa maong sugyot gilakip niini ang gikinahanglang gahin nga igasto sa maong proyekto.
Kahinumdoman nga ubos sa administrasyon ni senatoriable Governor Gwendolyn Garcia kusganon nga gihimoan og lakang ang kampanya batok sa illegal nga drugas.
Gani bag-o pa lamang nga giumol ang Provincial Anti Drug Abuse Commission sa tinguha nga mapalapdan pa gayud ang kampanya batok sa ginadili nga drugas. (BANAT NEWS)
- Latest
- Trending
