CEBU, Philippines - Gipasar sa konseho sa dakbayan sa Sugbo ang usa ka resolusyon nga nag-awhag sa mga kan-anan dinhi sa siyudad nga ilakip sa ilang baligya nga pagkaon ang mga prutas, utanon ug mga ilimnon nga sustansyado sa lawas.
Si Konsehal Alvin Dizon kinsa maoy nangamahan sa maong resolusyon miingon nga nagkadaghan na karon ang kaso bahin sa obesity kon naghinubra katambok sa tibuok kalibotan.
Alang kang Dizon nga responsibilidad sa goberno ang pagprotehir sa panglawas sa mga tawo, base sa Article II Section 15 sa Philippine Constitution.
Gibase ni Dizon ang iyang resolusyon sa nasuta sa World Health Organization (WHO) nga mokabat sa 2.3 bilyones ang kaso sa overweight karon sa tibuok kalibotan diin ang 700 million niini matawag nga obese.
Ang Philippine National Nutritional Health Evaluation and Survey mipakita nga 19.6 % sa mga Filipino ang overweight ug 4.9% ang obese.
Gikataho usab nga pipila sa mga FiIipino mahiligong mokaon sa mga fast food apan minos og ehersisyo.
Busa giawhag sa konseho ang Department of Health (DOH) ug ang National Nutrition Council (NNC) nga magpahigayon og wellness summit aron mahingusgan ang kampanya batok sa obesity.
Matud pa ni Dizon nga importante kaayo ang pagkaon nga makahatag og kaayohan sa lawas busa iyang giawhag ang katawhan nga kinahanglang mag-amping gyud sa mga pagkaon nga kaunon matag adlaw. (BANAT NEWS)