4-anyos patay sa dengue sa Talisay

CEBU, Philippines - Usa ka 4-anyos nga batang babaye ang namatay tungod sa dengue sa dakbayan sa Talisay sa milabay’ng semana.

Ang biktima mao si Shanica Bas, taga barangay Lagtang, dakbayan sa Talisay.

Ang amahan sa biktima nga si Ricky Bas, nga nahinabi kagahapon sa Banat News mibutyag nga mga upat ka adlaw gihilantan ang iyang anak apan magduwa-duwa lang gihapon kini.

Tungod sa kabalaka gidala nila kini sa Talisay City District Hospital niadtong Hunyo 25, 2012 ug gipa-laboratory diin ang resulta sa laboratory nag-Urinary Track Infection (UTI) ang biktima.

Matud ni Ricky nga gihatagan sila og resita sa doktor sa usa ka antibiotic nga tambal ug pag-abot nila sa balay nianang hapon gipainom dayon nila ang bata sa tambal.

Apan milagom ang iyang anak pila ka minutos ang nakalabay human makainom og tambal hinungdan nga ilaha kining gitabang ug gidala og balik sa TCDH ug kini gi-admit.

Si Ricky nagkanayon nga gipabalhin sila ngadto sa Vicente Sotto Memorial Medical Center ug didto gitabang na usab ang iyang anak ug diha pa nila mahibaw-ing dengue ang mitapot sa iyang anak ug pagkasunod adlaw sayo sa buntag namatay kini.

Si Talisay City Councilor Choy Aznar, committee chairman sa panglawas sa konseho sa siyudad sa pakighinabi niini sa Banat News mipahigayon sila og mist-blowing sa gipuy-an sa biktima.Giawhag niya ang publiko nga manglimpiyo kanunay sa ilang palibot ilabi na karon nga ting-uwan. Ang Talisay maoy ikaupat sa talaan sa probinsiya sa Sugbu nga dunay labing daghang kaso sa dengue. Sa report sa Department of Health (DOH) mikabat sa 6.1 porsyento ang saka sa kaso sa dengue sa Central Visayas gikan sa Enero 1 ngadto sa Mayo 5, 2012 diin 2,049 ka kaso ang natala ug 19 niini ang patay. (BANAT NEWS)