Piniriso gidunggab sa kauban priso

CEBU, Philippines - Nabartolina ang usa ka piniriso tungod sa pagdunggab sa laing piniriso nga dugay na niyang kaaway pasado alas- 9 sa miaging gabii diha sa ikaduhang andana sulod sa Cebu City Jail.

Ang biktima nga si Emmanuel Porillo, 46, taga barangay Lorega San Miguel ning dakbayan nalandig sa Cebu City Medical Center tungod sa samad dinunggaban sa iyang dughan ug likod.

Ang suspek mao si Harold Dequitos, taga barangay Tejero ug kasamtangan usab nga nadetinar sa city jail tungod sa kasong muder ug illegal possession of firearms.

Sa imbestigasyon sa kapolisan nasayran nga ang biktima kinsa nabilanggo tungod sa kasong pagpangawat miadto sa visiting area diha sa ikaduhang andana apan dihang nag-abot sila sa suspek kalit siyang gidunggab niini.

Sa pakighinabi sa Banat News ni SPO4 Alex Dacua sa Homicide Section sa Cebu City Police Office kini mibutyag nga ang suspetsado dugay nang adunay kalagot sa biktima.

Gipangita pa usab sa mga imbestigador ang hinagibang gigamit sa suspek ug kung giunsa pagkahitabo nga nakasulod kini sa maong pasilidad.

Dunay linaing imbestigasyon nga gihimo ang Bureau of Jail Management and Penology sa CCJ sa maong hitabo.

Si Supt. Johnson Calub sa CCJ mibutyag sa Banat News nga nagkabingkil ang duha tungod kay gipasanginlan sa suspek ang biktima nga maoy misumbong sa kapolisan maong napriso ang iyang amahan tungod sa kaso sa ilegal nga drugas, ang amahan sa suspek matud pang Calub atoa na sa National Bilibid Prison sa Muntinlupa. (BANAT NEWS)