CEBU, Philippines - Tulo ka mga proyekto ang unang siguradohong i-implementar ni Kongresista Eduardo Gullas sa unang distrito sa probinsiya sa Sugbo kung mapili kining mayor sa dakbayan sa Talisay.
Una ang katumanan sa giplanohan sa iyang apong si Gerald Anthony “Samsam” Gullas Jr. nga magtukod og sports center sa Talisay nga dunay sitting capacity nga 15, 0000. Si Samsam maoy gituboy sa Alayon Party nga padaganon hulip ni Gullas sa unang distrito.
Plano usab ni Gullas nga mabutangan og export processing zone sa dakbayan ug paghimo nang City of Talisay State College ang Talisay City College.
Sunod nga lihukon ni Gullas ang pag-ugmad sa 1.3 ektaryang luna sa kanhi merkado publiko sa Tabunok aron kini mapuslan.
Si Romeo Villarante ang oposisyon sa konseho sa Talisay nga ubos sa Liberal Party mibutyag nga wala pa silay kandidato iatbang nila ni Gullas ug Bise Mayor Allan Bucao.
Samtang wala say kompirmasyon si Mayor Antonio “Abby” Canoy sa San Fernando kung modagan kini atbang ni Samsam, sumala pang Villarante. (BANAT NEWS)