Taga Bohol ang gi-salvage

CEBU, Philippines - Nailhan na ug gikuha na sa mga kabanay ang patay’ng lawas sa gituohang biktima sa ‘summary execution’ kansang lawas napalgan daplin sa dalan sa barangay Manipis sa dakbayan sa Talisay niadtong Domingo sa kaadlawon.

Si SPO1 Mikie Espina nga nahinabi sa Banat News mibutyag nga ang biktima mao si Isidro Lanoy, buwag sa asawa lumad nga taga President Garcia, probinsiya sa Bohol apan temporaryong nagpuyo diha sa dalan Hernan Cortes, barangay Kasuntingan, dakbayan sa Mandaue.

Matud ni Espina nga ang maong impormasyon nakuha lang nila gikan sa punerarya tungod kay wala na nila maabti ang igsuon sa biktima nga si Mario Lanoy nga maoy mikuha niini.

Giingong nabasahan lang sa kabanay sa biktima diha sa balita ang kabahin sa usa ka tawong gi-salvage sa dakbayan sa Talisay, giingong uwahi kini nakit-ang buhi   Hunyo 30 sa gabii diha sa Mandaue. 

Ang kapolisan karon naghuwat sa mga paryente ni Lanoy aron pagkuha og dugang impormasyon alang sa kasulbaran sa maong krimen.

Si Lanoy gibinaklid og gapos og pisi ang mga kamot ug tiil niini ug ang iyang mga mata, ilong ug baba gibaatan og packaging tape ug may samad pinusilan sa ulo dihang kini napalgan. (BANAT NEWS)