Sikyu mikatkat sa rooftop kay maghikog

CEBU, Philippines - Usa ka security guard kinsa gituohang libog og utok mikatkat sa rooftop   sa upat ka andanang edipisyo nga iyang gibantayan kay maghikog, apan mikanaog human sa kapin sa lima ka oras nga negosasyon sa kapolisan kagahapon sa alas-8:30 sa buntag sa dalan F. Ramos duol sa barangay hall sa barangay Zapatera ning siyudad.

Si Benedicto Rosaceña, 42, stay-in sa nagpadayong construction sa upat ka andanang edepisyo sa maong lugar, sakop sa Visda Security Agency ug lumad nga taga Tapilon, Daanbantayan, Cebu, wala madayon sa pag-ambak gikan sa atop sa maong edipisyo .

Mikatkat sa maong edipisyo ang nahisgutang guwardiya kagahapon sa alas 4:00 sa kaadlawon kay buot unta siyang maghikog gumikan sa kabug-at sa iyang problema.

Sila si Supt. Arnel Banzon, hepe sa Special Weapons and Tactics (SWAT), Supt. Rex Derilo, hepe sa Firearms Explosives Division (FED), Chief Insp. Bonifacio Garciano, hepe sa Investigation and Detective Management Branch (IDMB) maoy miyembro sa negotiating panel kagahapon sa buntag nga mikombinse kang Rosaceña sa pagkanaog gikan sa iyang gisak-an nga rooftop. Sa wala pa mokanaog si Rosaceña nangayo kini og pistola apan wala siyay lisensya sa armas.

Sunod niyang gipangayo sa kapolisan mao ang cellphone ug kuwarta hinungdan nga gihatagan siya og P5 mil apan wala niya dawata.

Nabantayan sa kapolisan nga nagpunay og yawyaw si Rosaceña samtang didto siya sa ibabaw nga bahin sa building.

Matud sa iyang mga kauban nga ilang nabantayan si Rosaceña nga sa milabay’ng gabii aduna kini gikaestorya ug gikalalis sa cellphone ug pagkahuman mikuha kini og beer sa usa ka tindahan nga wala gani magpahibawo kun iya ba kining utangon o bayran.

Human imna ni Rosaceña ang serbesa, nabantayan sa iyang mga kauban nga wala na kini matulog ug nagpunay na lang og pasopaso hangtud nga misaka siya sa atop sa pagka- alas-4:00 sa kaadlawon.

Dihang gi-interview kini sa mga tigbalita iyang gibutyag nga sulod na sa 15 ka tuig siyang guwardya nga wala siyay lisensya ug nagtrabaho siya sulod sa 12 ka oras nga nagdawatan lang og P148 ang adlaw.

Siya mitug-an nga midagan siya sa ibabaw sa building kay gigukod kuno siya sa iyang mga kauban nga nagdala og tubo ug gusto siyang patyon.

Si Sr. Supt. Melvin Ramon Buenafe, hepe sa Cebu City Police Office (CCPO) miingon nga nagduda silang adunay deperensya sa pangisip si Rosaceña maong iya kining gipadala sa Cebu City Medical Center aron ipa -check-up ug pagkahuman iya usab kining ipadala ngadto sa Psychiatric Ward sa Vicente Sotto Memorial Medical Center (VSMMC).

Si Garciano mitug-an nga ilang gidala sa CCMC si Rosaceña apan mibalibad kini sa doctor nga dili siya magpa check-up.

Apan bisan pa man niini, mitataw si Garciano nga ila gihapon kining pasakaan og kasong alarm and scandal ngadto sa piskaliya. (BANAT NEWS)