Eddiegul mag-mayor sa Talisay

CEBU, Philippines - Gikonpirmar na ni Kongresista Eduardo Gullas sa unang distrito sa probinsiya sa Sugbo nga mokandidato siya pagka-mayor sa dakbayan sa Talisay sa election sa sunod tuig.

Sa gipahigayong press conference kagahapon sa hapon sa iyang buhatan sa University of the Visayas (UV) si Gullas nagkanayon   nga gusto nalang unta niyang mo-sentro sa pagdumala sa UV apan tungod sa hangyo sa iyang mga lider nga pakandidatohon siya pagka- mayor naaghat siya sa pagtuman niini.

Si Gullas kinsa last-termer na karon sa kongreso nagkanayon nga ang ilang mga ginikanan nagpahimangno kanila kaniadto nga usa lang unta ang moserbisyo sa publiko apan dili usab siya kabalibad sa hangyo sa ilang mga lider sa Talisay tungod kay kanunay usab siyang manghangyo kanila.

Hinuon matud sa Kongresista nga anaa ang iyang anak nga si Gerald Anthony “Didi” Gullas nga motabang sa iyang uyoan nga si kanhi Kongresista Jose “Dodong” Gullas sa pagdumala sa UV.

Si Bise Mayor Alan Bucao, maoy mopares kang Gullas sa pagka-bise mayor gihapon.

Samtang si Mayor Socrates Fernandez kinsa anaa usab sa katapusang termino molansar sa pagka-konsehal sa maong dakbayan.

Gibutyag ni Gullas nga si Fernandez gitanyagan ni Gobernador Gwendolyn Garcia nga mag-bise gobernador sa iyang manghud nga si Pablo John Garcia apan gibalibaran kini sa nahauna.

Ang mga konsehal sa Talisay nga ubos sa Alayon nga anaa pa sa ilang termino mao sila si Konsehal Eduardo “Digul” Gullas III apo sa kongresista, Dennis Basillote, Celiapo Cabuenas, Choy Aznar ug Eduard Alesna.

Bahin sa giingon nga gidapit sa ubang lider sa administrasyon ang pipila ka sakop sa oposisyon nga motipon kanila, apan matud pa ni Gullas nga respetohan niya ang ubang lider sa paghimo og desisyon kalabot niini kay alang kaniya taas kaayo ang listahan sa mga kandidato sa partido Alayon. Kahinumdoman nga ang apo ni Gullas nga si Gerald Anthony “Samsam” Gullas Jr. opisyal nang gituboy nga mokandidato sa pagka-kongresista sa unang distrito.

Bahin sa isyu nga gihimo nang daynastiya sa mga Gullas ang Talisay ug ang unang distrito ang beteranong magbabalaod nagkanayon nga ang katawhan maoy angayang mohukom niini kinsa maoy nagpili sa pamilyang Gullas sa milabay’ng eleksiyon

Kagahapon gipaila usab sa kongresista ang mga mokandidatong mayor ug bise mayor sa unang distrito nga mao gihapon sila si Mayor Lionel Bacaltos ug Bise Mayor Azucena Sesaldo sa Sibonga, Mayor Nicepuro Apura ug Bise Mayor Patrick Barcenas sa dakbayan sa Carcar, Ricardo “Nonoy” Reluya Jr. ug ang iyang asawa nga si kanhi Mayor Lakambini “Neneth” Reluya sa San Fernando, sa dakbayan sa Naga mao gihapon si Mayor Valdemar Chiong ug Bise Mayor Delfin Senior, samtang sa Minglanilla si Bise Mayor Lani Peña maoy mokandidato sa pagka- mayor puli kang Mayor Eduardo Selma nga bayaw sa kongresista, samtang ang mobise   mao si Konsehal Jojo Selma nga anak sa mayor.

Sa samang higayon gipasalig ni Gullas nga andam silang mosuporta    kang Bise Gobernador Agnes Magpale tungod kay suod kaayo kini sa ilang pamilya.

Susama usab niini ang iyang itunol nga suporta kang Gobernador Garcia kinsa mokandidato sa pagka-senador.

Hinuon bahin sa pagka-gobernador, si Gullas miingon nga wala pa nila kini kasaboti.

Bahin sa isyu nga makig-alyansa ang Alayon sa Liberal Party, si Gullas wala pa mokonpirmar niini tungod kay ang Alayon ubos kini sa landong sa Nacionalista Party nga gipangulohan ni Senador Manuel Villar. (BANAT NEWS)