Liberation sa Pilipinas
1945—Gideklarar sa Estados Unidos nga “liberation” o ang pagkalingkawas sa Pilipinas gikan sa mananakop nga Hapon. Kini human sa pipila ka bulan malampusong paglupig sa US fleet ang Japanese Imperial Navy sa Lingayen Gulf ug ang makasaysayanong Leyte Landing sa US Forces pinangulohan ni Gen. Douglas MacArthur. Hulyo 5, 1945 mipagawas og pamahayag si MacArthur nga “All the Philippines are now liberated.” Ang Japan napatyan og 425,000 sa maong giyera dinhi sa Pilipinas.
Cloned nga karnero
1996—Milampos ang mga siyentipiko sa pagkopya og usa ka linalang gikan sa DNA. Si Dolly ang unang cloned sheep nga ‘gipanganak’ diha sa Roslin Institute, Edinburgh , Scotland. Giilis sa mga siyentipiko ang nucleus sa usa ka egg cell sa nucleus gikan sa parent cell – si Dolly gikan sa cell sa usa ka Finn Dorset sheep. Ang Biologist nga si Keith Campbell maoy giila sa maong kalampusan.
SARS outbreak
2003—Gideklarar sa World Health Organization (WHO) nga nakontrolar na ang Severe acute respiratory syndrome (SARS). Ang SARS usa ka viral infection nga ang ig-on sa tawo mao ang baga niini nga makaingon sa SARS coronavirus. Una kining namatikdan niadtong Nobiyembre 2002 nga miresulta sa kabalaka sa mga tawo, Hulyo 2003 nag-outbreak ang SARS sa Hongkong ug diriyot mahimong pandemic tungod sa 8,422 ka kasong natala ug miabot na sa 916 ang namatay sa tibuok kalibutan. Sulod lang sa pipila ka semana miabot sa 37 ka nasud ang maong sakit una pa nakontrolar sa WHO.
Nokor missile test
2006—Malampusong napalupad sa North Korea ang duha ka short-range Nodong-2 missiles, ug usa ka SCUD missile ug dugang usa ka long-range Taepodong-2 missile. Ang gibuhat sa Nokor nakapaalarma sa kanasuran tungod sa kabalakang nagdala kini og nuclear payload ug dayag usab kini nga paglapas sa United Nations ban sa mga pag-testing sa mga nuclear weapons. - BANAT NEWS