Radaza mohatag og ganti sa makatug-an sa nangrakrak

CEBU, Philippines - Hatagan og ganti ni Lapulapu City Mayor Paz Radaza ang makahatag og impormasyon alang sa pagkasikop ni Demetrio Malingin, usa sa suspetsado sa pagrapido sa panimalay sa pamilyang Aying sa Brgy. Mactan dakbayan sa Lapulapu nga mikalas sa usa ka inahan sa milabay’ng semana.

Matud pa ni Radaza iya nang gimandoan si Lapulapu City Police office Director Sr. Supt. Rey Lyndon Lawas sa paghimo sa tanang pamaagi sa pagsikop ni Malingin nga giisip karong “public enemy # 1” sa dakbayan sa Lapulapu gumikan sa daghang kaso niini sa illegal nga drugas ug kasong pagpatay.

Kagahapon gilubong ang patay’ng lawas ni Prima “Emma” Aying ang usa ka inahan nga biktima sa pagpangrapido sa panimalay niini niadtong Hunyo 28 ning tuiga diin naigo kini sa ulo ug namatay diha dayon.

Nanghinaot si Radaza nga masulbad ang maong kaso nga gihulagway nga dili lamang adunay kalambigitan sa ilegal nga drugas ang motibo kundili lakip usab niini ang personal nilang panagbangi.

Hinuon ang kasong murder ug frustrated murder pormal na usab kining napasaka ngadto sa piskaliya bisan pa kung nagtago-tago ang magsuong Demetrio ug ilang ig-agaw nga si Jay Malingin ug lain pang kauban niini nga maoy responsable sa maong krimen.

Matud pa ni Radaza andam kining mohatag og reward ni kinsang makahatag og impormasyon.         

Hinuon giklaro sa kapolisan nga dili angayang ikaalarma ang maong hitabo ug dili kini makaapekto sa turismo gumikan kay usa lamang kini ka away pamilya. - BANAT NEWS