2 natagak sa kanal naangol

CEBU, Philippines - Grabeng kadaut nga naangkon sa kalawasan sa duha ka tawo dihang ang motorsiklo nga ilang gisakyan nalahos og kahagbong sa open canal sa dalan FF Cruz sa reclamation area sa dakbayan sa Mandaue sa milabay’ng gabii.

Si SPO4 Apolinario Niez, traffic investigator sa traffic division sa Mandaue City Police Office (MCPO) miila sa mga biktima nga mao sila si Ariel Patlingrao, 34 , ug Kim Dampios, 20, pulos taga barangay Sabang sa dakbayan sa Danao.

Matud pa ni Niez nga wala nay mga panimuot ang duha dihang giugkat sa mga sakop sa Accident Control Emergency and Response Team (ACERT) nga nalubong sa mga hugaw ug lapok sa sulod sa maong kanal nga ilang nahagbongan.

Dugang pa ni Niez nga si Josephine Rato, 37, nga nagpuyo sa barangay Paknaan, dakbayan sa Mandaue nga igsoon ni Patlingrao maoy nag-ila sa duha dihang mibisita kini sa Vicente Sotto Memorial Medical Center sa dakbayan sa Sugbo kagahapon.

Matud pa niya nga ang duha ka biktima nga pulos walay identification card sa ilang mga pitaka maoy hinungdan nga wala dayon nila makuha ang mga pangalan niini. Dugang pa ni Niez nga base sa gitug-an ni Josephine ngadto kaniya nga ang duha gikan sa dakbayan sa Sugbo ug paingon kini sa bag-ong merkado publiko sa sitio Tribunal sa barangay Centro sa maong dakbayan.

Dihang nahidangat kini sa maong lugar kalit lamang kining nahagbong ngadto sa open canal nga ang tubig nga nagdagayday gikan sa kabarangayan sa maong dakbayan paingon ngadto sa dagat sa maong lugar. - BANAT NEWS