CEBU, Philippines - Gipasalig sa mga kadagkoan sa Greenergy Solution Incorporated nga dili maapektohan ang panginabuhian sa kapin sa 300 ka mga mamunitay og basura diha sa Inayawan Sanitary Landfill sa higayon nga maimplementar ang proyekto sa kagamhanan ug sa maong pribadong kompanya nga himuon kining energy plant area.
Ang kagamhanan sa dakbayan gidasig sa Greenergy Solution aron motabang sa paghimo sa mga basura ngadto sa enerhiya.
Girekomendar na sa Solid Waste Management Board ang maong proposal ngadto kang Mayor Michael Rama sanglit walay magasto ang siyudad niini.
Kabahin kini sa Private Public Partnership (PPP) program sa siyudad gani nakakuha na kini og permit sa United Nations.
Ang usa sa mga partner sa maong proyekto nga si Anita Celdran misaysay nga moabot ngadto sa 400 ka mga trabahate ang ilang kuhaon kung maimplementar na ang maong proyekto.
Busa ang kapin sa 300 ka scavengers sa Inayawan matagaan na og desenteng trabaho.
Dugang pa ni Celdran nga kung maimplementar na ang maong programa makatabang kini sa kalikupan ug mapapas na unya ang mga reklamo sa pipila ka pribadong sektor kaniadto nga matud pa nga maabot sa pipila ka bahin sa South Road Properties (SRP) ang baho sa basura gikan sa Inayawan.
Wa pa hinuon matino kung kanus-a masugdan ang nahisgutang proyekto sanglit ipaubos pa kini sa lapad nga pagtoon.
Kung kini masugdan na, matukod sa Inayawan Material Recovery Facility, Anaerobic Digestion System ug Refused Derived Fuel Plant. - BANAT NEWS