Ordinansahon ipaagi na lang og plebisito

CEBU, Philippines - Ipaagi na lang og plebisito aron mahibaw-an gyud ang kinatibuk-ang sentimiyento sa katawhan kalabot sa gi-veto ni Mayor Michael Rama nga kontrobersyal nga ordinansa sa konseho nga magsilot sa mga ginikanan nga makapasakit sa ilang pagdisiplina sa ilang mga anak.

Kini maoy gisugyot ni Bise Mayor Joy Augustus Young aron mahilom na ang nagkadaiyang reaksyon sa katawhan apan iyang giklaro nga ipadangat pa niya sa konseho ang iyang sugyot.

Matud pa ni Young nga maayo unta ang tumong sa maong ordinansa apan angayan na lang kini hisgutan ini’g kahuman og eleksyon aron dili masagulan og kolor politika.

Samtang ang nangulo sa maong ordinansa nga si Konsehal Leah Japson mipadayag nga nadismaya siya sa pag-veto ni Rama sa maong ordinansa tungod kay wala masabti sa mayor ang pipila ka bahin sa maong ordinansa sanglit ang tumong niini mao ra ang pag-protehir sa mga kabataan.

Gipadayag ni Japson nga nag-agi og public hearing ang maong ordinansa ingon man usab sa taas nga proseso sa wala pa kini napasar sanglit ang mga nagkadaiyang non-government organization man ang miagni kaniya nga moumol sa maong ordinansa.

Apan si Japson miingon nga dili haom nga ipaagi og plebisito apan iya kini nga respetohan kung maoy hukom sa konseho.

Si Rama mi-veto sa ordinansang gibansagang “anti-corporal punishment ordinance” atol sa iyang State of the City Address (SOCA) sa miaging adlaw ug gitawag niya kining anti-poor tungod kay nasayod siyang ang mga kabus maoy maigo niini og maayo ilabi na sa multang P5,000. (BANAT NEWS)