CEBU, Philippines - Ang mga drayber adunay katungdanan nga kun maaberiya ang ilang gimanehong sakyanan, ilabi na panahon sa gabii, butangan gyud nila kini og reflectorized Early Warning Device (EWD) ang luyo nga bahin.
Kun wala gani sila’y EWD, butangan nila og sulo nga dinagkotan ang dapit sa luyo nga bahin sa sakyanan nga magsiga ug makita sa gilay-on nga 100 ka metros.
Ang balaud nga gilatid sa Section 34 sa Republic Act 4136 kon Transportation and Traffic Code, gitumong aron paglikay sa disgrasya nga madam-agan ang naabereyang sakyanan.
Sayop ang sagad himoon sa ubang motorista nga kun maaberiya butangan ra nila’g bato ang luyo nga bahin, dili kini makita sa mga nagsingabot nga drayber sa layo pa.
Gani ang balaud naglatid nga ang mata’g sakyanan kinahanglan gani nga aduna g’yuy “built-in reflectors” diha sa luyo nga bahin niini aron nga dali ra kini nga makit-an sa nagsingabot nga drayber.
Pipila ka tuig ang milabay, ang Supreme Court mihukom nga sad-an ang tag-iya ug ang drayber sa usa ka sakyanan nga naaberiya unya nadam-agan sa laing sakyanan kay wala magbutang og EWD.
Gipasabot sa labaw’ng hukmanan nga ang tag-iya ingon man ang drayber sa sakyanan nga maaberiya adunay katungod sa pagpadaplin ug kun walay kapadaplinan, butangan nila kini og Early Warning Device aron makabantay ang nagsingabot nga mga sakyanan.
Apan sa kalungsoran ug sa hilit nga mga dapit nga wala kaayo’y manakop, sagad sa mga tag-iya og sakyanan wala na mag-atiman mao nga ang ilang mga suga nangapunder na ug wala lang gihapon ilisi.
Ang lagda sa Republic Act 4136 naglatid nga ang matag sakyanan, bisan gani ang motorsiklo, kinahanglang aduna g’yuy suga sa pangunahan ingon man sa luyo kun magdagan sa karsada.
Karong bag-o, dunay lakang nga dili irehistro sa Land Transportation Office ang mga sakyanan kun ang mga tag-iya dili makapakita og EWD, apan ingon sa wala pa kaayo kini hugti sa pagpatuman.
Ang mga drayber nga madakpan ug maisyuhan og Temporary Operators Permit (TOP) kay depektoso ang mga suga sa atubangan ug luyo makabayad gyud og daku-daku nga multa.
Sa motorsiklo, ang mga drayber makamulta og kapin sa usa ka libo ka pesos. - BANAT NEWS