CEBU, Philippines - Nga gamit sa illegal fishing nasakmit sa mga sakop sa Criminal Intelligence Branch (CIB) sa Cebu City Police Office (CCPO) kagahapon sa alas-8 sa buntag nga gikarga sa usa ka pumpboat nga giabandonar diha sa kadagatan sa sitio Mahayahay 2 sa barangay Pasil ning siyudad.
Si Chief Insp. Romeo Santander, hepe sa CIB nga nahinabi sa mga tigbalita nagkanayon nga nakadawat sila og impormasyon nga dunay duha ka mga lalaking nagsakay og pumpboat nga nagdala og daghang blasting caps ug cyanide nga modunggo diha sa maong lugar gikan sa dakbayan sa Talisay.
Sa ilang pag-abot sa maong lugar ilang naabtan ang naglutawlutaw nga pumpboat diha sa dagat apan wala na ang duha ka mga lalaking sakay niini maong gipaguroy na lang kini padaplin.
Dihang ilang gisusi ang luwan sa maong pumpboat ilang nakit-an ang lima ka bandol nga blasting caps nga himuong pabilo sa dinamita ug usa ka kilong cyanide nga gitawag og “koskos” nga usa ka matang sa panghilo sa isda.
Ang Explosives Ordnance Division (EOD) miingon kaniya nga dili lang magamit sa ilegal nga panagat ang blasting caps kay magamit usab kini paghimo og bomba.
Gidugang ni Santander nga naghigpit karon ang kapolisan batok sa mga eksplosibo nunot sa nahitabong pagpamomba sa tower sa National Grid Corporation of the Philippines (NGCP) sa Camanaga lungsod sa San Miguel sa lalawigan sa Bohol niadtong Hunyo 24.
Dunay pangalan sa duha ka mga lalaking giingong maoy nagdala niini apan dili pa nila ikabutyag sanglit nagpadayon ang ilang gihimong imbestigasyon. (BANAT NEWS)