CEBU, Philippines - Usa ka 17-anyos nga dalagita ang gitabangan lugos sa duha ka habal-habal drayber niadtong buwan sa Mayo 14 ning tuiga apan kagahapon lang adlawa misumbong sa kapolisan.
Ang nasikop mao si Jaype Orello, 19, molupyo sa barangay Casili syudad sa Mandaue kinsa hugtanong mihimakak sa pasangil ug mirason nga siya ray gitudlo kay siya ray nailhan.
Ang Womens Desk sa Canduman Police Station nga si SPO3 Junafe Vergara mibutyag sa Banat News nga kagahapong adlawa nagpatabang kanila ang pamilya sa 17-anyos.
Matud pa ni Vergara nga base sa gisaysay sa biktima pauli na unta kini ug misakay sa habal-habal apan nabantayan nalang niini nga mitipas kini sa laing dalan padulong sa hilit diin dunay laing lalaki nga nagpaabot.
Pag-abot didto gihulga siyang adunay dautang mahitabo ug gipulipulihan kini paglugos sa maong duha ka mga lalaki, ang usa niini gikatahong adunay tabon sa nawong.
Human niini gibiyaan siya sa duha ka mga lalaki ug gihulgang dili patug-anon sa nahitabo kaniya ni bisan kinsa. Dihang naabot ang biktima sa ilaha wala kini motug-an sa mga ginikanan tungod sa kahadlok sa hulga.
Niadtong Hunyo 15 iya na gyud nga giingnan ang iyang mga ginikanan sa nahitabo dihang gisitar kini sa mga ginikanan sa kausaban sa linihokan niini. Si Orello gidakop sa kapolisan human positibong gitumbok sa biktima.
Dugang kasayuran, gikan sa report sa Balitang Bisdak, mihimakak si Orello sa pasangil batok kaniya diin mibutyag kini nga siya lang ang nailhan sa biktima apan ang nagpahimulos gyud niini mao ang laing lalaki.
Matud pa ni Orello nga andam siya nga mamahimong saksi kun ugaling siya maoy patudluon sa lalaking tinuoray nga mipahimulos sa biktima. (BANAT NEWS)