DSWD7 mihinabang sa nabiktima sa Sendong

CEBU, Philippines - Nadawat sa 2,883 ka mga pamilya sa Negros Oriental ang hinabang gikan sa kagamhanan pinaagi sa programa nga gitawag nga Emergency Shelter Assistance (ESA).

Ang maong pundo nga gikan sa nasudnong  kagamhanan gipaagi sa Department of Social Welfare and Development (DSWD) 7 sa Central Visayas nga alang sa mga nabiktima sa kalamidad didto sa maong lalawigan.

Ang pagpanghatag sa maong hinabang gihimo didto sa Provincial Convention Center sa syudad sa Dumaguete ug Tanjay City Hall sa miaging adlaw.

Sa maong okasyon, may 134 ka pamilya ang nakadawat og hinabang pinaagi sa Core Shelter Assistance Project (CSAP) nga alang sa pagpatukod sa ilang bag-ong mga balay sa lungsod sa Siaton ug Bacong sa maong lalawigan nga nagusbat gumikan sa bagyong Sendong sa miaging tuig.

Gikompirmar ni Regional Director Ma. Evelyn Macapobre sa Department of Social Welfare and Development (DSWD) 7 sa Central ang pagpanghatag ngadto sa hingtungdang  benepisyaryo sa mokabat sa P25,320,000 nga kantidad sa Emergency Shelter Assistance ug Core Shelter Assistance nga gigahin alang sa pagtubag sa panginahanglan sa   pagpa-ayo sa nagubang mga kabalayan sa mga hingtungdan. Alang niadtong mga nabiktimang pamilya nga nawad-an og pinuy-anan tungod sa bagyong Sendong nga miigo sa napulo ka lungsod sa Negros Oriental.

Ang napulo ka lungsod nga nakadawat sa maong housing assistance gilangkoban sa Siaton, Sibulan, Bacong, Valencia, San Jose, Amlan, Pamplona, Mabinay, ug syudad sa Dumaguete ug Tanjay nga adunay kinatibuk-ang 3,017 ka mga benepisyaryo.

Sa maong pundo, P15,940,000 ang gigahin alang sa ESA samtang P9,380,000 alang sa pagpatukod sa 134 Core Shelter Units.

Ang matag pamilyang benepisyaryo sa ESA nakadawat og P5,000 alang sa pagpaayo sa ilang balay samtang kadtong mga benepisyaryo kansang mga balay hingpit gyung nagusbat nakadawat og tag P10 mil. Kadtong gipabalhin sa pagpapuyo sa usa ka relocation site nga gipahigayon sa kagamhanan sa lalawigan nakadawat og tag P70 mil.   - BANAT NEWS