CEBU, Philippines - Gihangop sa mga opisyal sa kagamhanan sa dakbayan sa Lapulapu ang katumanan sa ilang gidamgo nga bag-ong teknolohiya sa pagkolekta sa basura nga dili maapektohan ang panglawas sa tawo.
Si Lapulapu City Mayor Paz Radaza nagkanayon nga usa kini ka German technology diin ang hiposong basura hikayon nga makahatag og enerhiya sama sa kuryente.
Si Michael Jimenez ang Presidente sa Zehera USA nga maoy mopaila sa maong teknolohiya mipasalig nga usa kini ka environment friendly nga paagi ug walay basurang mausik.
Ang maong kahimanan modawat og malata ug dili malata nga basura tungod kay aduna kini kaugalingong pamaagi sa pagbahig sa basura.
Gumikan sa kadaghang basura nga gikinahanglang galingon sa maong ekipo matag adlaw, mahimong kuwangon ra unya ang koleksyon nga basura sa Lapulalapu busa bisan ang mga basura sa taga mainland Cebu mahimong ikapagaling pa sa maong kahimanan.
Adto kini ibutang sa upat ka ektaryang luna tupad sa Material Recovery Facility sa sitio Soong sa barangay Mactan nga gahinan og P1.2 bilyones.
Matud pa ni Radaza nga mao kini ang mohatag og tukmang sulusyon bahin sa problema sa basura sa dakbayan sa Lapulapu ug makahatag pa kini og dugang trabaho sa mga Oponganon. - Bong Soriano/WC (BANAT NEWS)