CEBU, Philippines - Ang Department of Trade and Industry (DTI) 7 maoy unang rehiyonal nga buhatan sa DTI sa tibuok nasud nga nasuplayan og 5,000 ka Import Commodity Clearance (ICC) sticker nga maoy ipapilit sa helmet sa mga motorista nunot niining higpit nga pagpatuman sa helmet law sugod sa Agusto 1, 2012.
Matud pa ni Rose Mae M. Quiñanola, Agency Head sa Consumer Welfare and Business Regulatory Division nga nakabentaha gayud ang buhatan sa DTI sa rehiyon 7 itandi sa ubang rehiyon tungod kay una kining nakapang-apud-apod sa mga ICC sticker alang sa kwalipikadong helmet.
Dugang pa niya nga ang maong mga ICC sticker may tagsa-tagsa ka control number nga maoy timaan kung kini genuine o paltik o mini aron nga dili mailad ang mga motorista nga mopalit og helmet sa mga establisementong nagbaligya na niini.
Ang rehistrasyon sa pagsukod kun madawat ba o dili ang klase sa mga helmet nga gipanul-ob na karon sa mga motorista gisugdan niadtong Miyerkoles didto sa DTI provincial office diin gikan sa buntag hangtod sa hapon walay bugto ang linya sa mga motorista nga miparehistro sa ilang mga helmet.
Segun sa taripa sa DTI ang magpahiling sa helmet mobayad og P100 ug kun kwalipikado ang iyang helmet modugang siya og P1.25 alang sa ipapilit nga ICC sticker niini busa mokabat ang tanang bayranan og P101.25.
Hinuon kundili mopasar sa standard ang ilang helmet, dili usab sila pabayron sa maong kantidad.
Giklaro ni Quiñanola nga may gipapilit silang listahan sa matang sa helmet nga mopasar sa kalidad nga gipangita sa DTI.
Gibana-bana nga mokabat sa 500 ka mga helmet matag adlaw ang gitinguha sa DTI nga mahiling hangtod nga Hulyo 31, 2012.
Kini nahimo agi og pagtuman sa balaod nga RA 10054 o Motorcycle Helmet Act of 2009 nga nagbaod sa tanang motorista ug pasahero niini sa pagsul-ob og standard nga helmet aron sa pagsiguro sa ilang kaluwasan sa panahon nga sila madisgrasya. - WC (BANAT NEWS)