Mamumuo way mapaabot nga usbaw karong tuiga
CEBU, Philippines - Walay mapaabot nga usbaw sa suhulan ang mga trabahante sa Central Visayas ning mga panahona bisan paman ang ubang mga rehiyon mihatag niini sa ilang mga mamumuo.
Kini tungod kay gituohang ang Regional Tripartite Wage and Productivity Board-7 dili modeklarar nga dunay "supervening conditions", aron imando sa board ang usbaw sa suholan.
Ang supervening conditions nagpasabot mao ang pagmahal sa mga presyo sa palaliton, serbisyo ug uban pa maong ang suhulan sa mga mamumuo dili mapaigo sa inadlaw-adlaw nilang panginahanglan.
Si Jose Tomongha, usa sa mga labor representatives diha sa RTWPB-7 nagkanayon bisan kombinsido ang labor sector nga dunay supervening conditions, ang management sector (mga negosyante) ug duha ka representante sa gobiyerno diha sa board dili motuong duna niini karong mga panahona.
Matud pang Tomongha ang nakapait mao mag-inusara ra siya sa gikatakdang diskusyon karong Hulyo 12 tungod kay ang laing labor representantive nga si Atty. Ernesto Carreon atoa pa sa Amerika. "Mao ni ang nakapait sa sitwasyon kay ini og votation na unya kung naa bay supervening conditions or wala, pilde na gyud ang labor kay ako ra usa ang mobotar. Kanang duha ka government representatives klaro na man na nga ang ilang leaning sa management gyud na sila,” matud pang Tomongha.
Ang mga sakop sa RTWPB-7 naglangkob og duha gikan sa labor sector (Carreon ug Tomongha), duha sa mga negosyante (Atty. Hidelito Pascua lug Charles Streegan) ug tulo ka representante sa gobiyerno (Department of Trade and Industry-7 regional director Asteria Caberte, National Economic Development Authority-7 Buenaventura Gosoco ug Department of Labor and Employment-7 regional director ug maoy RTWPB-7 chairman nga si Glroia Tango. Hinuon naglaom pa gihapon si Tomongha nga sa kadugayan aduna pa gihapoy usbaw sa suholan nga mahatag sa mga mamumuo apan dili pa sa Septiyembre 22,2012 diin matapos ang usa ka tuig nga ban sa subling pagpatuman og usbaw sa suhulan. - Mitchelle Palaubsanon sa The Freeman/EIM (BANAT NEWS)
- Latest
- Trending
