Sulbad vs Traffic ug Baha

CEBU, Philippines - J. Mall mibayad og advance nga buhis sa siyudad sa Mandaue ang gubaon ug hagip-ot nga mga dalan sa hilit nga mga dapit sa kabarangayan sa dakbayan sa Mandaue maoy nag-unang reklamo sa mga drayber ug pasahero sa mga traysikol sama sa sitio Calderohan sa barangay Maguikay nga giingon nilang dugay nang gisugdan sa pagtrabaho apan wala gihapon mahuman.

Usa sa nakaingon sa paghuot sa trapiko mao ang paglambo sa mga negosyo ug nagkadaghang gipangtukod nga establisamento. Hinuon ang J. Mall Center sa dalan A.S. Fortuna sa barangay Bakilid kansang tagdumala mibayad og advance sa ilang buhis nga nagkantidad og P18 milyones.

Kini aron dunay magamit ang siyudad aron palapdan ang dalan A. Albano nga nagtadlas sa dalan M.L. Quezon sa barangay Maguikay ug dalan A.S. Fortuna sa barangay Bakilid nga maoy nahimutangan sa maong establisamento.

Ang road widening resulta sa mga pagtuon sa pagsulbad sa naghuot nga mga sakyanan sa dalan A.S. Fortuna ug ang grabeng pagbaha panahon sa ting-ulan.

Gihangop ni Bise Mayor Glenn Bercede ang gihimo sa maong mall ug mihulagway sa dakong pagsalig sa mga tagdumala ngadto sa siyudad.

Si Justin Uy nga maoy presidente sa Everjust Realty Development ug tag-iya sa J. Mall Center maoy personal nga mitugyan sa tseke isip advance nilang buhis ngadto ni Mayor Jonas Cortes.

“This is our gesture of support to the present administration in implementing the Albano road and drainage -project so that traffic in the area will eased up,” ni Justin Uy pa sa iyang pamahayag. (FREEMAN)