CEBU, Philippines - Usa ang patay samtang duha ang angol sa pagpamusil ug pagpanunggab nga nahitabo sa nagkalainlaing dapit ning dakbayan sa Sugbo sa miaging Biyernes.
Ang namatay mao si Domingo Yakit, hingkod nga taga barangay Carreta, samtang ang mga angol mao sila si Raffy Baculi, 32, nga taga Banawa ug si Exusur Balsabas Absin, 53, nga taga Buhisan, tanan ning dakbayan sa Sugbo.
Si SPO4 Rey Cuyos sa Homicide section sa kapolisan sa dakbayan sa Sugbo nagkanayon nga nagpalit og sigarilyo si Yakit dihang giluthang kini sa wala hiilhing kriminal.
Ang mga samad sa iyang tuong bahin sa dughan ug sa walang bitiis maoy nakaingon sa iyang kamatayon ug padayon pang gipangita sa kapolisan ang killer.
Samtang si Baculi giingong nagduwa og video games didto sa Banawa dihang kalit lang miduol kaniya ang usa ka bayong-bayong kansang ngalan gipugngan ug kalit siyang giluba sa ice pick niini.
Matud pa ni Baculi nga nangabubho kaniya ang suspetsado kay nakita siyang nakig-estorya sa uyab niini, hinuon mitahan dayon ang suspek ngadto sa kapolisan.
Samtang si Absin giingong giluba ni Nino Sumbilon, 25, ulitawo dihang mibadlong kini sa naulahi nga dili mangayo og kuwarta kanila kay kuwang sila og kinitaan.
Kini human balibari ang biktima ni Arlinda nga iyang igsoon, ug kapuyo usab sa biktima, kay wala lagi silay kuwarta. Apan nasuko ang suspetsado ug kalit kining milanit sa iyang kutsilyo ug gihansakan ang abaga sa biktima.
Ang suspetsado gipangita pa karon sa kapolisan ,samtang ang duha ka angol anaa karon sa Cebu City Medical Center. (FREEMAN)