CEBU, Philippines - Ang Department of Environment and Natural Resources (DENR) 7 mipahigayon og awarding ceremony pagpasidungog sa mga katambayayong kon Environmental and Natural Resources (ENR) partner niini sa Central Visayas atol sa silver anniversary and environment month culmination niadtong miaging Biyernes.
Ang gipasidunggan mao ang siyam ka Local Government Units (LGUs), tulo ka People's Organizations (POs), tulo ka Non-Government Organizations (NGOs), duha ka media partners, tulo ka pribadong kompanya ug usab ang Regional Trial Court Judge sa siyudad sa Dumaguete.
Ang mga awardees nga nagagikan sa LGUs mao ang Barangay Canduman sa syudad sa Mandaue, lungsod sa Ayungon ug Bindoy, Negros Oriental, lungsod sa Candijay Bohol, syudad sa Carcar, Argao ug Cordova sa Sugbo ug Cebu City Parks and Playground Commission.
Nakadawat usab og pasidungog ang Pollution Association of the Philippines (PCAPI), Foundation for Economic Freedom ug ang Siliman University-Angelo King Center for Research and Environmental Management.
Ang mga nakadawat og pasidungog nga nagagikan sa pribadong sektor mao ang Carmen Copper Corporation, Marianne Development Corporation ug ang Tree Kings Incorporated.
Dugang nakadawat og pasidungog usab ang Ayungon Forest Management Organization Inc. sa Ayungon Negros Oriental; Anislagan Farmers Association sa syudad sa Carcar ug San Miguel Association Resources Team (SMART) sa Danao ug Bohol.
Si DENR 7 Regional Executive Director Isabelo Montejo miingon nga kung wala ang presensya ug suporta sa publiko ug pribadong sektor dili nila makab-ot ang kalampusan sa ilang mga nagkadaiyang aktibidad.
Dugang pa ni Montejo nga kinahanglang makig-alayon sila sa nagkadaiyang mga magpapatigayon sa pagkab-ot sa ilang mga tahas ug tumong ug usab aron sa pagsiguro sa proteksyon sa kinaiyahan samtang palamboon usab ang panginabuhian sa matag usa.
Atol usab sa maong programa sa ilang rehiyonal nga buhatan gipaila usab ang mga empleyado nga misilbi sa DENR sa sulod sa labaw sa 25 ka tuig. (FREEMAN)