Duha angol sa pagpanulis sa usa ka establisamento

CEBU, Philippines - Duha ang naangol sa nahitabong tulis kagahapon sa buntag diha sa Ebra Promotion and Ayala Center, Cebu Business Management and Services sa barangay Cansojong, dakbayan sa Talisay.

Ang maong agency nahimutang kini sulod sa compound sa Ngosiok Bihon Factory.

Ang mga naangol human mapusili sa mga tulisan mao ang security guard nga si Jonathan John Adlawan, 31, taga barangay Tungkil, lungsod sa Minglanilla ug ang warehouse man sa bihonan nga si Jessie Jacson, 19, taga barangay Ocaña, dakbayan sa Carcar.

Si Adlawan ug Jacson parehong natapsingan og bala sa ilang walang bukton ug abaga ug gidala sa Saint Vincent Hospital sa dakbayan sa Sugbo. Na-recover sa mga polis gikan sa may guardhouse ang usa ka deformed slug sa wala pa mapiho nga kalibre sa armas.

Si SPO1 Mikie Espina kinsa maoy nag-imbestigar sa hitabo mibutyag nga usa sa tulo ka mga tulisan giingong nagpurong og blue nga t-shirt nga uniporme sa bihon factory.

Nadala sa mga tulisan ang P20,000 nga kwarta nga para unta sweldo, Vio cellular phone nga nagkantidad og P17,000 nga iya sa agency coordinator nga si Norwena Cabahug, 31, taga barangay Yati, lungsod sa Lilo-an.

Gawas niini nadala usab sa mga tulisan ang mga personal nga butang ug dokumento ni Cabahug.

Matud ni Espina walay armas ang maong gwardiya tungod kay giingong maoy pagbuot sa tagdumala sa establisamento nga dili siya padalhon og armas.

Giingong kalit nga misulod ang duha ka mga tulisan ug gitionan si Adlawan ug gimandoan sa paghapa, sunod nga misulod ang usa ka lalaking nagmotorsiklo diha sa gate.

Matud usab ni Espina gidala sa duha ka tulisan si Adlawan sulod sa guardhouse ug gipusil sa walang bukton ug nakuyapan. Duha dayon ka tulisan ang misulod sa buhatan ni Cabahug ug gitulis sila sa sulod.

Ang mga tulisan nagdali sa pag-ikyas apan giingong dunay butang nga gidala sa mga tulisan ang natagak ug puniton unta ni Jacson kinsa hangtud anang mga orasa wala masayod nga dunay nahitabong pagpanulis ug nahibaw-an lang niya kini dihang usa sa mga tulisan ang mipusil kaniya. (FREEMAN)