CEBU, Philippines - Usa ka transport association sa Sugbu walay supak sa petisyong nagtinguhang paubsan ang pletihan sa mga jeepney ug taksi nunot sa nagsunod nga pag us-os sa presyo sa petrolyo sugod sa buwan sa Mayo. Si Ryan Benjamin Yu, ang tsirman sa Cebu Integrated Transport Service Multi-purpose Cooperative (CITRASCO) sa pakighinabi mibutyag nga kutob lang sa P7 nga pag us-os ang ilang mahatag gikan sa P7.50.
"The P1.50 jeepney fare reduction is way too much. We can only afford to reduce by .50 centavos," matud pa ni Yu, kinsa mao say tsirman sa Cebu Confederation of Transport Operators and Drivers Association Inc.(CCTODAI) nga mao ang organisasyon sa tanang transport associations sa Cebu nga gilangkuban sa mga jeepneys, taxi, buses, mini-buses ug trucking.
Matud pang Yu nga niadtong 2003 ngadto sa 2004 ang presyo sa diesel P25 ngadto na sa P28 matag litro ug ang minimum fare P6.00, apan karon ang presyo sa diesel P39 kapin matag litro. Kabahin sa petisyon nga paubsan ang flagdown rate sa taksi gikan sa P40 balik sa P30, wala say supak niini ang CITRASCO sumala pa ni Yu.
Apan si Richard Cabucos, nga presidente sa Metro Cebu Taxi Operators Association (MCTOA) kusganong misupak niini.
"Dili mi mosugot nga reduce ang pletihan sa taxi. Mosupak gyud mi ana," matud pang Cabucos.
Sumala pa ni Cabucos bisan nibarato na ang petrolyo wala moubos ang presyo sa mga piyesa sa sakyanan.
“Mayman og lana ra ang atong basehan. Ang presyo sa lana, sa baterya ug uban pa mahal man lang gihapon," pasabot pa ni Cabucos kinsa miingon nga lahi ra kaayo ang pagmentinar og taksi kumparar sa mga jeepney.
“Para sad ni sa atong mga turista nga nindot ang atong mga taxi. Besides, wala namo gipamugos ang among sakyanan. Ang mosakay og taxi, only those who can afford,” niya pa. Gikatakda ang public hearing sa petisyon karong Hulyo 5, ug apil na niini P1.50 nga petisyon sa PUJ fare reduction nga dinhi gipasaka sa Cebu. Ang Consumers Rights and Economic Welfare (CREW) nga usa ka consumer group maoy mipasaka sa petisyon nga himuon na lang P6 ang pletihan. (FREEMAN)